بەهمەنی قوبادی رونكردنەوە لەبارەی ئەو وشانەی دەدات كە دەوترا لە دژی ئیسلام وتویەتی

03:48 - 27/11/2022

2675جار خوێندراوەتەوە

خەندان لایف

دەرهێنەر و سینەماكاری كورد، بەهمەنی قوبادی رونكردنەوەی لەبارەی ئەو وشانەی دەدات كە دەوترا لە دژی ئایینی ئیسلام وتویەتی و دەڵێت، "هەرگیز مەبەستم نەبوە سوكایەتی بە هیچ ئایینێك بكەم و بە هەڵە لە قسەكانم تێگەیشتون".

بەهمەنی قوبادی لە رێگەی ڤیدیۆیەكەوە لە تۆڕی كۆمەڵایەتی ئینستاگرام رونكردنەوەیەكی بڵاوكردەوە و تێیدا دەڵێت، "من هەمیشە عەرەب و ئەدەبیات و خەڵكەكەیم خۆشویستوە، من هەرگیز ناتوانم ئازاری هیچ كەسێك بدەم، وە لەبارەی ئایین، هەرگیز سوكایەتیم بە ئیسلام نەكردوە، بەڵام من لە دژی ئەو ئیسلامیانەم كە منداڵ دەكوژن، كە ژنەكانمان دەكوژن، كە دەستدرێژی دەكەنە سەر ژن و كچەكانمان".

وتیشی، "یەك وشە لەو ڤیدیۆیەدا دیارنەماوە، ئەویش وشەی ئیسلامیی توندڕەوە، ئەو ئیسلامیانەی وشەی "اللە" دەهێنن و لە تەنیشتی خەنجەرێك دایدەنێن و دەیكەنە سەر ئاڵاكەیان، من لە دژی ئەو جۆرە ئیسلامیانەم".

هەروەها ئاماژەی بەوەشكرد، "كەسانی شارەزای ئیسلام پێویستە رەنگێكی نوێ بدەن بە ئیسلام، من دڵنیام زۆرینەی عەرەب دژی ئەو ئیسلامیە توندڕەوانەن، من دوێنێ بە برایانی عێراق، لوبنان و سوریام وتوە كە لە تەنیشتمان بوەستن، چونكە ئەگەر ئێوە لە تەنیشتمان بوەستن، ئەوان چیتر برا و خوشكەكانمان ناكوژن".

هەوەها رونیشیكردەوە، "من هیچ مافی ئەوەم نییە سوكایەتی بە ئایینێك بكەم كە تەنها یەك كەسیش پەیڕەوی بكات، ئێمە یەكجار لەدایكدەبین، ئایینی من خۆشەویستییە، رێزی هەر كەسێك دەگرین كە هەر ئایینێكی هەبێت، ئەوەی من دەیڵێم ئەوەیە كە ئەوان بە ناوی ئیسلامەوە دەسەڵات دەگرنە دەست و خراپ بەكاریدەهێنن و ئەم جۆرەش شوێنەكەی ئێران نییە".

لە كۆتاییدا وتی، "من هەرگیز ناتوانم خراپتان بكەم و سوكایەتیتان پێبكەم، بەڕاستی شێت بوم كە ئەو وشانەم بیست لەسەر من وترابون، من هاوڕێكانم عەرەبن، رۆشنبیران و سەركردە گەورەكان، لە سینەما یان میوزیك و نوسین، ئەو عەرەبانەن كە لە ئێرانن، من كەسێك نیم بتوانم ئەوە بڵێم، ئێمە هەمومان یەكیین، نابێت پارچە پارچە بین، هەرگیز وشەی رق بەكارناهێنم، دەبێت یەكترمان خۆشبوێت، رەنگی چاوی من هەمان رەنگی تورك و عەرەبە، پێویستە ئاشتی بگەڕێنینەوە، ئەوە هەمو شتێكە كە دەمویست بیڵێم".

بەهمەن قوبادی یەکێکە لە دیارترین دەرهێنەرە کوردەکان و خاوەنی چەندین خەڵاتی جیهانییە و ناودارترین فیلمەکانی بریتین لە؛ "ساتێک بۆ مەستی ئەسپەکان"، "نیوە مانگ"، کیسەڵەکانیش دەفڕن"، "کەس ئاگای لە پشیلە ئێرانییەکان نییە"، هەروەها "وەرزی کەرکەدەن"