ئایا ئەلیسا رەخنەی لە ئەدهەم نابلسی گرتوە پاش ئەوەی گەڕاوەتەوە سەر ئایینی ئیسلام؟

12:30 - 04/09/2022

7267جار خوێندراوەتەوە

خەندان لایف

خانمە گۆرانیبێژی لوبنانی، ئەلیسا رەتیكردەوە لەبارەی ئەدهەم نابلسی هیچ لێدوانێكی دابێت و تەواوی ئەو دەنگۆیانەی رەتكردەوە كە بەناوی ئەلیساوە لەسەر ئەو بابەتە بڵاوكراونەتەوە.

ئەلیسا لە تویتێكدا لەبارەی ئەو لێدوانانە هاتە دەنگ لە بەناوی ئەوەوە بڵاوكرانەوە و  رایگەیاند، "هەندێك لێدوانی هەڵە لە زمانی منەوە بڵاوكراونەتەوە و جێگەی داخە کە لە پێگە متمانەپێكراوەكانەوەیە، جارێک دەربارەی سوریا، جارێک دەربارەی ئایینی ئیسلامی كە دڵنیام ئەمەم نەوتوە و نایڵێم، نەشچومە ناو وردەکارییەکانی ئایینی هیچ کەسێكەوە". 

هەروەها ئەوەشی خستەڕو، كە تەواوی لێدوانەكانی لە لاپەڕە فەرمییەكانی خۆی بڵاودەبێتەوە، ئەوەی لە پێگەكانی دیكە بڵاودەبێتەوە دورن لە راستییەوە و هەمویان قسەوقسەڵۆكن.

ئەمە لە كاتێكدایە لە چەند رۆژی رابردو دەنگۆی ئەوەی بڵاوبوەوە كە ئەلیسا قسەی لەبارەی وازهێنانی ئەدهەم نابلسی كردوە و لۆمەی كردوە لەسەر ئەوەی لەپێناو ئایینی ئیسلام وازی لە گۆرانی وتن هێناوە، بەڵام ئەلیسا بەزویی ئەو دەنگۆیانەی رەتكردەوە.