جێگر میدیا رونكردنەوە لەبارەی گۆرانییەكەی خۆی و شیلان ئاكچان دەدات

11:47 - 06/08/2022

12002جار خوێندراوەتەوە

خەندان لایف

هونەرمەند گۆرانیبێژ، جێگر میدیا حسێن لەبارەی گۆرانییەكەی خۆی و شیلان ئاكچان رونكردنەوە دەدات كە لە ماوەی رابردو بڵاویكردەوە، روبەروی رەخنەیەكی زۆر بوەوە و دەوترا، "سوكایەتی بە ئایین دەكات".

جێگر میدیا لە لاپەرەی فەرمی خۆی لە تۆڕی كۆمەڵایەتی ئینستاگرام، ڤیدیۆیەكی بڵاوكردەوە لە بارەی گۆرانییە نوێیەكەی و رایگەیاند، "سوپاسی ئەو كەسانە دەكەم كە پشتگیری بەرهەمەكەیان كرد، بۆ ئەم بەرهەمە بەدوای دەنگێكی سۆپرانو دەگەڕام لە خانمان، هەربۆیە دەنگی شیلانم پەسەند كرد، كە توانی گۆرانییەكە بە باشی ئەدا بكات و بیڵێتەوە لەگەڵمدا".

وتیشی، "ئەم گۆرانییە دورە لە سوكایەتی بە ئایینی ئیسلام، لەبەر ئەوەی من خۆم مسوڵمانم و لە وڵاتێكی مسوڵمان دەژیم و باوەڕم بە دیین هەیە، هەموان دەزانن مێژوی من چییە و شێوازی كاركردنم چۆنە".

لەبارەی گۆرانییەكەش ئەوەیخستەڕو، "ئەمە بەرهەمێكی مامۆستای گەورە، حەسەن زیرەكە، كە لە ساڵی 1953 لە رادیۆی بەغدا وتویەتی، نەچوەتە ناو خەڵكەوە، من توانیم بیكەمە ناو خەڵكەوە".

ئەمە لە كاتێكدایە جێگر میدیا لە كەناڵی یوتیوبی خۆی بەرهەمێكی فۆلكلۆری لەگەڵ شیلان ئاكچان بڵاوكردەوە، كە لە تێكست و ئاوازی هونەرمەدی كۆچكردو، حەسەن زیرەكە، ئاریۆس كاری میوزیكی بۆ ئەنجامداوە.