چیرۆكی ئەو كچە روسیەی بە دەنگ و جوانیەكەی بوەتە جێی سەرنجی تۆڕە كۆمەڵایەتییەكان

11:56 - 01/03/2022

22311جار خوێندراوەتەوە


جولیا گاڤریلۆڤیا، كچە روسیەكی تەمەن 14 ساڵە، یەكێك بو لە بەشداربوانی بەرنامەی "باڵندەی شین" و "دەنگی منداڵان" لە روسیا و توانی تا قۆناغی كۆتایی بڕوات، بەهۆی دەنگە خۆشەكەی بوەتە جێی باسی تۆڕە كۆمەڵایەتییەكان.

جولیا لە یەكێك لە گوندە سادەكانی روسیا دادەنیشێت، كە دەكەوێتە هەرێمی سەمارا، لەگەڵ ئەوەی تەمەنێكی كەمی هەیە، بەڵام خەونەكانی گەورەن و دەیەوێت ببێت بە گۆرانیبێژێكی ناسراو و ناوبانگی سنورەكانی تێپەڕێنێت.

ئەو كیژە دەنگخۆشە لە منداڵییەوە حەزی بۆ هونەر هەبوە و لە خێزانێكی هونەری هاتوەتە دنیاوە، باوكی میوزیكژەنە، هەر ئەمەش وایكردوە لە تەمەنی 5 ساڵییەوە جولیا فێری ژەنینی ئامێری پیانۆ ببێت و بەردەوام بوە تا تەمەنی 9 ساڵی.

دایكی جولی دەڵێت، "كچەمەم لەگەڵ ئەوەی بە باشی میوزیك دەژەنێت، هەستمان بەوە دەكرد دەنگێكی خۆشی هەیە، هەربۆیە هانماندا بەشداری پرۆگرامی دەنگخۆشی بكات، خۆشبەختانە لە یەكەمین قۆناغدا سەرنجی ئەندامانی لیژنەی بۆ خۆی راكێشا".

وتیشی، "گەیشتن بە قۆناغی كۆتایی بۆ كچێك كە لە گوندەوە هاتوە، زیاترە لە سەركەوتن بۆ ئێمە، ئەو هیچ مامۆستایەكی پرۆفیشناڵی نەبو، تەنها بڕوابەخۆبونی خۆی و ئێمەی هەبو".

جولیا لە ئێستادا بەردەوامە لەسەر كاری هونەری، زۆرینەی كاتەكانی لەگەڵ تیمەكەی سەرقاڵی راهێنانە، ئەو خەونەی بەدی هاتوە كە حەز دەكات ناوبانگی سنورەكان تێپەڕێنێت و هەوادارێكی زۆری هەیە.