لە تەمەنی 61 ساڵی هاوسەرگیری دەكات و دەیەوێت ببێتەوە بە دایك

02:39 - 16/01/2022

67726جار خوێندراوەتەوە

خەندان لایف

"خۆشەویستی تەمەن نازانێت"، خانمێك لە تەمەنی 61 ساڵی ئەم وتەیە پشتڕاست دەكاتەوە و دەكەوێتە داوی خۆشەویستی كوڕێكی 24 ساڵ و بەهیوای ئەوەیە دوبارە ببێتەوە بە دایك.

بە پێی هەواڵێكی رۆژنامەی دەیلی مەیلی بریتانی، ژنێكی رۆمانی بەناوی شێریل مكگریگۆر، كە لە 61مین ساڵی تەمەنیدایە، خاوەنی 7 منداڵ و 17 نەوەیە، لە ساڵی 2012 كەوتوەتە داوی خۆشەویستی كوڕێكی گەنجەوە بەناوی كوران مكاین، ساڵی رابردو ژیانی هاوسەرگیریان پێكهێنا.

ئەو دو هاوسەرە سەرەڕای ئەوەی جیاوازی تەمەنیان 37 ساڵە بەهیوای ئەوەن منداڵیان هەبێت، بەڵام بەهۆی تەمەنی شێرل-ەوە، بڕیاریان داوە لە رێگەی "surrogacy"ی منداڵەكەیان ببێت، كە پرۆسەیەكە تێیدا هێلكە و تۆو لە منداڵدانی كەسێكی دیكەدا دەپیتێنرێت، لە ئەگەری سەرنەكەوتنی ئەو پرۆسەیەدا بڕیاریان داوە منداڵێك هەڵبگرنەوە.

شێریل لەبارەی بون بە دایكەوە دەلێت، "دەزانم كە بەتەمەنم و ناتوانم ئاگاداری منداڵ بم، بەڵام هاوسەرەكەم گەنجە و توانای هەڵگرتنی بەرپرسیاریەتی هەیە، دڵنیام ئەو دەبێت بە باوكێكی نمونەیی، متمانەم پێیەتی، هەروەها خێزانەكانمان پاڵپشتیمان دەكەن".