هەواڵی ئەمڕۆ

سەرۆک وەزیرانی بریتانیا و دەسەڵاتدارانی ئەوروپا لە ئەمریکا کۆدەبنەوە

10:42 - 21/09/2019

1103جار خوێندراوەتەوە

خەندان-        

بۆریس جۆنسۆن، سەرۆک وەزیرانی بریتانیا لە کۆبونەوەی گشتی نەتەوە یەکگرتوەکان کە ئەم هەفتەیە لە نیویۆرک بەڕێوەدەچێت لەگەڵ بەرپرسە باڵاکانی ئەوروپا کۆدەبێتەوە بۆ گفتوگۆکردن و گەیشتن بە رێککەوتن لەبارەی دەرچونی بریتانیا لە یەکێتی ئەوروپا.

بەپێی ئاژانسی هەواڵی رۆیتەرز، بەرپرسێکی باڵای بریتانیا رایگەیاند، وابڕیارە ڕۆژی دوشەممە و سێشەممەی ئەم هەفتەیە، جۆنسۆن چاوی بە هەریەکە لە لیۆ فرادکار، سەرۆک وەزیرانی ئیرلەندا و دۆناڵد تەوسک، سەرۆکی ئەنجومەنی ئەوروپا و ئیمانوێڵ ماکرۆن، سەرۆکی فەڕەنسا و ئەنگێلا مێرکڵ، راوێژکاری ئەڵمانیا بکەوێت.

جۆنسۆن  هەوڵەکانی چڕترکردوەتەوە بۆ گۆڕانکاری لەو رێکەوتننامەیەی کە تێرێزا مەی لەگەڵ بڕۆکسڵ ئەنجامیدابو

 

جۆنسۆن کە پێشتر پەیمانیدابو بە دەرچونی بریتانیا لە یەکێتی ئەوروپا لە 31ی ئۆکتۆبەری ئەمساڵدا بە رێککەوتن بێت یاخود بەبێ رێککەوتن، لەئێستادا هەوڵەکانی چڕترکردوەتەوە بۆ گۆڕانکاری لەو رێکەوتننامەیەی کە تێرێزا مەی، سەرۆک وەزیرانی پێشوی بریتانیا لەگەڵ بڕۆکسڵ ئەنجامیدابو.
گفتوگۆکانی نیویۆرک دەرفەتێکی باشە بۆ گەڕان بەدوای بیرۆکەی نوێدا

 

بەرپرسە باڵاکەی بریتانیا وتی، "گفتوگۆکانی نیویۆرک دەرفەتێکی باشە بۆ گەڕان بەدوای بیرۆکەی نوێدا، سەبارەت بە بابەتە خۆراکی و کشتوکاڵی و گومرگی و پیشەسازیەکانی پەیوەندیدار بە سنورەکانی ئیرلەنداوە".

وا بڕیارە جۆنسۆن لەم سەردانەیدا بۆ نیویۆرک، دوبەدو  گفتوگۆ لەگەڵ هەریەکە لە دۆناڵد ترەمپ، سەرۆکی ویلایەتە یەکگرتوەکانی ئەمریکا و ناریندرا مودی، سەرۆک وەزیرانی هند و رەجەب تەیب ئەردۆغان، سەرۆک کۆمار تورکیا و جاسیندا ئەردەیرن، سەرۆک وەزیرانی نیوزلەندا ئەنجامبدات.