خەندان-
سه‌رۆكی چین له‌دیدارێكدا له‌گه‌ڵ هاوتا سوریه‌كه‌ی رایگه‌یاند، هه‌ردو وڵات په‌یوه‌ندییه‌كی هاوبه‌شی ستراتیژی له نێوانیاندا داده‌مه‌زرێنن و چینیش به‌رده‌وام ده‌بێت له هاوكاری و پاڵپشتیه‌كانی بۆ سوریا.
شی جین پینگ سه‌رۆكی چین له میانه‌ی دیدارێكی له‌گه‌ڵ به‌شار ئه‌سه‌د هاوتا سورییه‌كه‌ی ئه‌مڕۆ هه‌ینی له شاری خانژۆ رایگه‌یاند، به هاوبه‌شی دامه‌زراندنی هاوبه‌شییه‌كی ستراتیژی ڕاده‌گه‌یه‌نین، كه ده‌بێته بڕگه‌یه‌كی گرنگ له مێژوی په‌یوه‌ندییه‌كانی نێوان هه‌ردو وڵاتدا.
سوریا یه‌كێكه له یه‌كه‌م وڵاته‌كان كه په‌یوه‌ندی له‌گه‌ڵ چینی نوێ دامه‌زراند
ئاماژه‌ی به‌وه‌شكرد، سوریا یه‌كێكه له یه‌كه‌م وڵاته‌كان كه په‌یوه‌ندی له‌گه‌ڵ چینی نوێ دامه‌زراند، هاوكات یه‌كێك بو له‌و وڵاتانه‌ی كه پڕۆژه بڕیارێكی پێشنیاركرد بۆ گه‌ڕاندنه‌وه‌ی كورسی چین له نه‌ته‌وه یه‌كگرتوه‌كان.
چین ئاماده‌یه به‌رده‌وامبێت له‌هاوكاریه‌كانی بۆ سوریا
سه‌رۆكی چین ئاماده‌یی وڵاته‌كه‌ی بۆ په‌ره‌پێدانی هاریكاری له‌گه‌ڵ دیمه‌شق ده‌ربڕی و وتی، "له‌به‌ر ڕۆشنایی بارودۆخی نێوده‌وڵه‌تی پڕ له‌ناسه‌قامگیری و نادڵنیایی، چین ئاماده‌یه به‌رده‌وامبێت له‌هاوكاریه‌كانی بۆ سوریا و پاڵپشتی توندیشی ده‌كات بۆ په‌ره‌پێدانی هاریكاریه‌كان".
دیمه‌شق به ئومێده‌وه چاوی له ڕۆڵی بنیاتنه‌ری چینه له گۆڕه‌پانی نێوده‌وڵه‌تیدا
لای خۆیه‌وه به‌شار ئه‌سه‌د ئاماژه‌ی به‌وه‌دا، دیمه‌شق به ئومێده‌وه چاوی له ڕۆڵی بنیاتنه‌ری چینه له گۆڕه‌پانی نێوده‌وڵه‌تیدا و هه‌مو هه‌وڵه‌كان ڕه‌تده‌كاته‌وه بۆ لاوازكردنی ئه‌م ڕۆڵه له ڕێگه‌ی ده‌ستوه‌ردان له كاروباری ناوخۆی چین یان هه‌وڵدان بۆ دروستكردنی گرژی له ده‌ریای باشوری چین یان له باشوری ڕۆژهه‌ڵاتی ئاسیا .
سه‌رۆكی سوریا سه‌ردانه‌كه‌ی بۆ چین له‌ڕوی كات و هه‌لومه‌رجه‌كه‌یه‌وه به گرنگ وه‌سفكرد، به‌و پێیه‌ی ئه‌مڕۆ جیهانێكی فره جه‌مسه‌ری پێكده‌هێنرێت كه هاوسه‌نگی و سه‌قامگیری بۆ جیهان ده‌گه‌ڕێنێته‌وه، به‌و هیوایه‌ی هاوكاریی ستراتیجی فراوان و درێژخایه‌ن له جۆربه‌جۆره‌كان دابمه‌زرێنێت كێڵگه‌كانی نێوان هه‌ردو وڵات.
دوێنێ پێنجشه‌ممه، به‌شار ئه‌سه‌د سه‌رۆك كۆماری سوریا له یه‌كه‌م سه‌ردانی فه‌رمی خۆی بۆ ئه‌و وڵاته له ماوه‌ی نزیكه‌ی دو ده‌یه‌ی رابردودا گه‌یشته چین.