شێروان شێروانی: من نەشکاوم و ساختەکار نیم

04:57 - 20/07/2023

10085جار خوێندراوەتەوە

خەندان-

یەکێک لەو چالاکوانانەی کە ئەمڕۆ ئامادەی دانیشتنی دادگاییکردنی شێروان شێروان بو لەدادگای هەولێر رایدەگەیەنێت، لە ماوەی دو ساڵ و پێنج مانگی ڕابردودا و ڕۆژنامەوان شێروان شێروانی بە 10 ساڵ زیندانیکردن حکومدراوە و دەشڵێت، "ئەمڕۆ لەدانیشتنەکەدا شێروان شێروانی وتی، من نەشکاوم، ئەوە ئێوەن لەبەرامبەر وزە و ئیرادەی مندا شکاون و لە پەلەقاژێدان، ساختەکار من نیم".

کامەران عوسمان چالاکوان کە ئەمڕۆ لەدادگاییکردنەکەی شێروان شێروانی ئامادەبو، لەهەژماری تایبەتی خۆی لەتۆڕی کۆمەڵایەتی فەیسبوک نوسیویەتی، "شێروان بە ساختەکردنی پەنجەمۆری (گوهدار زێباری) تۆمەتبارکرابو، کە گوایە لە 18ی (ئاب/8)ی 2022 ، داوایەکی ئاڕاستەی دادگا و داواکاری گشتی کردوە و داوای هەڵوەشاندنەوەی داخوازینامەی (ئیفراج شەرتی) بۆ خۆی و هاوڕێکانی کردوە".

گوهدار زێباری لەبەردەم دادوەردا شایەتیدا و وتی من و هاوڕێکانمان لە زیندان

بەوتەی ئەو چالاکوانە، "گوهدار زێباری لەبەردەم دادوەردا شایەتیدا و وتی من و هاوڕێکانمان لە زیندان، شێروانمان کردوە بە وەکیلی خۆمان کە لە هەر بابەتێکی پەیوەندیدار بە کەیسەکەمان واژۆ و پەنجەمۆر بکات، کۆکردنەوەی واژۆ و پەنجەمۆری بە کۆمەڵ و پێشکەشکردنی داخوازینامە لە بری یەکتر کلتوری ناو چاکسازییەکانە و هەمو ئەوانەی لە یەک کەیسدا حکومدراون، بۆ یەک و لە بری یەکتر داخوازی پێشکەش دەکەن".

دادوەر بە پێی ماددەی 295 لە یاسای سزادانی عێراقی بڕیاریدا بە سزادانی شێروان شێروانی بە زیندانیکردن بۆ ماوەی دو ساڵ و شەش مانگ

دەشڵێت، "لە دوای سێ کاتژمێر و نیو لە دادگاییکردن، دادوەر بە پێی ماددەی 295 لە یاسای سزادانی عێراقی بڕیاریدا بە سزادانی شێروان شێروانی بە زیندانیکردن بۆ ماوەی دو ساڵ و شەش مانگ و بە پێی ماددەی 298 لە یاسای سزادانی عێراقی، زیندانیکردنی بۆ ماوەی یەک ساڵ و شەش مانگ کە بە کۆی گشتی دەکاتە چوار ساڵ زیندانیکردن".

بڕیاروابو کە لە 9ی (ئەیلول/9)ی ئەمساڵ شێروان شێروانی ئازادبکرێت

ئاشکراشیکردوە، "ماوەی سێ ساڵە ڕۆژنامەنوسان و چالاکوانانی بادینان، لە ڕێگەی بەکارهێنانی یاسا و دادگا لە دژیان بە ئامانجگیراون، بە تایبەتی شێروان شێروانی کە سەرباری هەبونی لێخۆشبونی تایبەتی سەرۆکایەتی هەرێمی کوردستان بۆی، لەئێستادا حوکمەکەی درێژکراوەتەوە، بڕیاروابو کە لە 9ی (ئەیلول/9)ی ئەمساڵ شێروان شێروانی ئازادبکرێت، بەڵام بەگوێرەی بڕیاری ئەمڕۆی دادگا، ناوبراو بۆ ماوەی چوار ساڵی تر لە زینداندا دەبێت".

کامەران عوسمان باسی لەوەشکردوە، "لە ماوەی دو ساڵ و پێنج مانگی ڕابردودا و لە دو کەیسی جیادا، ڕۆژنامەوان شێروان شێروانی بە 10 ساڵ زیندانیکردن حکومدراوە، بەڵام ئەمڕۆ شێروان بە دەنگی بەرز و ورەیەکی پۆڵاینەوە وتی، (من نەشکاوم، ئەوە ئێوەن لەبەرامبەر وزە و ئیرادەی مندا شکاون و لە پەلەقاژێدان، ساختەکار من نیم، ساختەکار ئێوەن کە بە هەڵبژاردنی ساختە و پارە و دەسەڵاتی ساختە لە حکومدا ماون)".

نیشانەکردن

هەولێر

بەپەلە