چوار هۆکار دەخرێتەڕو.. لە پارێزگایەکی عێراق 200 حاڵەتی جیابونەوە لە مانگێکدا تۆماردەکرێت

06:58 - 01/12/2022

1696جار خوێندراوەتەوە

خەندان-

مانگی رابردو لە سنوری پارێزگای دیالە 200 حاڵەتی جیابونەوە لەنێوان هاوسەران تۆمارکراوە و سەندیکای پارێزەرانیش دەڵێت، هۆیەکانی پەیوەندیکردن، تۆڕە کۆمەڵایەتییەکان، دەستوەردانی هەردو خێزانی ژن و پیاو لە کێشە خێزانییەکان و دۆخی ئابوری دیاریترین هۆکارەکانی جیابونەوەن.

بونی ئەو ژمارەیە جێگەی سەرنجی پارێزەرانە
واثق حەسەن، ئەندامی سەندیکای پارێزەرانی عێراق لە لێدوانێکدا رایگەیاند، مانگی رابردو لە سنوری پارێزگای دیالە 200 حاڵەتی جیابونەوە لەنێوان هاوسەران تۆمارکراوە، ئەوەش بەراورد بە مانگی تشرینی یەکەم ئامارەکە کەمتربوە هەرچەندە بونی ئەو ژمارەیە جێگەی سەرنجی پارێزەرانە.
تۆڕە کۆمەڵایەتییەکان و فشاری ئابوری دیارترین هۆکاری جیابونەوە بون
ئەوەشی خسوەتەڕو، 20-25% جیابونەوەکان لەنێوان ئەو هاوسەرانەدا بوە کە چەند مانگێکی کەم بەسەر پرۆسەی هاوسەرگیرییاندا تێپەڕیوە، بەشێوەیەکی گشتیش هۆیەکانی پەیوەندی، تۆڕە کۆمەڵایەتییەکان، فشاری ئابوری و دەستوەردانی بنەماڵەی ژن و پیاو لە کێشەی خێزانی نێوان هاوسەران ، چوار دیارترین هۆکاری جیابونەوە بون.
حکومەت کاربکات بۆ کەمکردنەوەی کێشە خێزانییەکان و حاڵەتەکانی جیابونەوە
ئەو پارێزەرە دەڵێت، ئامارەکانی جیابونەوە جێگەی سەرنج و نیگەرانین، بۆیە پێویستە حکومەت لەرێگەی دەرچواندنی یاسا و زیادکردنی رۆشنبیری و هۆشیاری خێزانی، کاربکات بۆ کەمکردنەوەی کێشە خێزانییەکان و حاڵەتەکانی جیابونەوە.

نیشانەکردن

عێراق