رونکردنەوەیەک لە وەزارەتی سامانە سروشتییەکانەوە لەبارەی بەکارهێنانی سیستەمی غاز

03:21 - 23/11/2022

3197جار خوێندراوەتەوە

خەندان-

وەزارەتی سامانە سروشتییەکانی هەرێمی کوردستان رایگەیاند، بەدەر لە رێنمایی ژمارە (1)ی ساڵی 2020ـی وەزارەتی ناوخۆ، مۆڵەتیان بۆ دانانی سیستەمی گەرمکەرەوەی غازی ماڵان و کارگەکان و شوێنە تایبەتەکان بە هیچ کۆمپانیایەک نەداوە، بۆیە داوا لە هاوڵاتیان دەکەن خۆیان لە بەکارهێنانی سیستەمی غاز بەدور بگرن تا رێنمایی پێویست بۆ دڵنیابون لە سەلامەتی بەکارهێنانی سیستەمەکە دەردەچێت.

بەدەر لە رێنماییەکان، مۆڵەتمان بە هیچ کۆمپانیایەک نەداوە

وەزارەتی سامانە سروشتییەکان ئەمڕۆ لە راگەیەنراوێکدا ئاماژەی بەوەشکردوە، وەزارەتی سامانە سروشتییەکان وێڕای دەربڕینی هاوخەمیی خۆی لەگەڵ کەسوکاری قوربانیانی هەردو روداوە جەرگبڕەکەی سلێمانی و دهۆک، رادەگەیەنێت هیچ مۆڵەتێکی بۆ دانانی سیستەمی گەرمکەرەوەی غازی ماڵان و کارگەکان و شوێنە تایبەتەکان بە هیچ کۆمپانیایەک نەداوە، کە بە دەر لە رێنمایی ژمارە (1)ی ساڵی 2020 وەزارەتی ناوخۆ بێت.

خۆتان لە بەکارهێنانی سیستەمی غاز بەدور بگرن

ئەوەشی خستوەتەڕو، هەر مۆڵەتێکیش لە هەر شوێنێکەوە درابێت، بە بێ ئاگاداری وەزارەتی سامانە سروشتییەکان بوە، بۆیە داوا لە هاوڵاتیان و کۆمپانیاکان دەکەن خۆیان لە بەکارهێنانی سیستەمی غاز بەدور بگرن تا لە ڕێگای لێژنە تایبەتەکانەوە کاری پێویست ئەنجام دەدرێت بۆ دڵنیابون لە سەلامەتی بەکارهێنان.

لە سلێمانی 15 کەس و لە دهۆکیش 5 کەس بە تەقینەوەی غاز گیانیانلەدەستدا 

لە ماوەی هەفتەی رابردودا دو روداوی تەقینەوەی غاز لە سلێمانی و دهۆک رویاندا، لە ئەنجامیشدا 20 کەس گیانیانلەدەستدا و دەیان کەسی دیکەش برینداربون، هەروەها لە چەند ناوچەیەکی دیکەش گڕگرتنی غاز رویدا و چەند کەسێک بونە قوربانی، لەسەر ئەو بنەمایەش تا پێداچونەوە تەواو بە پرۆسەی هێنان و بەستنی سیستمی غاز ناسراو بە LPG دەکرێت، حکومەتی هەرێم بڕیاریدا بەکارهێنانی سیستەمەکە بەشێوەیەکی کاتی رابگیرێت.

نیشانەکردن

حکومەتی هەرێم