لەخورماڵ دەنگی "تەقینەوەیەکی گەورە" بیسترا

11:09 - 18/10/2022

13204جار خوێندراوەتەوە

خورماڵ

خەندان-

ئەمشەو لە ناحیەی خورماڵی سەر پارێزگای هەڵەبجە دەنگی تەقینەوەیەک بیسترا، بەرپرسانی سنورەکەش دەڵێن، تائێستا نازانن روداوەکە چی بوە، بۆیە لێکۆڵینەوە لە روداوەکە لەلایەن هێزە ئەمنییەکانەوە دەستیپێکردوە.

نازانین دەنگەکە هێرشی درۆن بوە یان تەقینەوەیە

فەرەیدون مەحمود، بەڕێوەبەری ناحیەی خورماڵ بە خەندان-ی راگەیاند، ئەمشەو لەناحیەی خورماڵ  دەنگی تەقینەوەیەک بیسترا، "ئێمەش نازانین ئایا دەنگەکە هێرشی درۆن بوە یان تەقینەوەیە".

هێزە ئەمنییەکان گەیشتونەتە شوێنی روداوەکە 

ئاماژەی بەوەشکرد، لەئێستادا هێزە ئەمنییەکان گەیشتونەتە شوێنی روداوەکە و لێکۆڵینەوەیان دەستپێکردوە، "وەک یەکەی ئیداری سنورەکەش هەستمان بەهیچ جوڵەیەکی فڕۆکەی بێ فڕۆکەوان نەکردوە، چونکە لە سنورەکەی ئێمەدا هیچ جموجۆڵێکی سەربازی نیە".

ئەنجامی لێکۆڵینەوەکان، چۆنیەتی روداوەکە دیاریدەکەن

بەڕێوەبەری ناحیەی خورماڵ وتیشی، ئەوە یەکەمینجارە روداو و دەنگی تەقینەوەیەکی لەو شێوەیە لە سنورەکەدا دەبیسترێت، چاوەڕێش دەکرێت تا چەند کاتژمێری داهاتو ئەنجامی لێکۆڵینەوەکان، چۆنیەتی روداوەکە دیاربکەن.