ئەمینداری یەكگرتو لەبارەی "پیلانێکی تێکدەرانە" هۆشداری دەدات

08:49 - 15/09/2022

4120جار خوێندراوەتەوە

خەندان-

سەڵاحەدین محەمەد بەهائەدین، ئەمینداری گشتی یەكگرتو رایگەیاند، بەشێک لە کەسانی ناسراو لە عێراق بەشێوەیەکی خراپ باس لە هاوەڵانی پێغەمبەر (د.خ) دەکەن کە ئاماژەیە بۆ "هەناسەی نەیارانی دۆڕاوی ئەهلی ئیسلام"، بۆیە لەبارەی "پیلانێکی تێکدەرانە" هۆشداری دەداتە لایەنەکان و داوادەکات ژیر و ئاوەزدارەکان رێگری لێبکەن.

ئەبێ ژیر و ئاوەزدارەکان لەهەمو لایەنەکان ڕێگری بکەن لەم پیلانی تێکدانە

سەڵاحەدین محەمەد بەهائەدین، ئەمینداری گشتی یه‌كگرتوی ئیسلامی كوردستان ئه‌مڕۆ لە پەیامێکدا باسی لەوەشکردوە، "سەحابەکان زۆرباڵاترن لەوەی  سوکایەتی کەسە قەزەمەکان بیانگاتێ، ئەوە هەناسەی نەیارانی دۆڕاوی ئەهلی ئیسلامە و ئەبێ ژیر و ئاوەزدارەکان لەهەمو لایەنەکان ڕێگری بکەن لەم پیلانی تێکدانە".

نەفرەت لەو ئاستە نزمە لە تێگەیشتنی ئیسلام

ئاماژەی بەوەشکردوە، "نەفرەت لەو ئاستە نزمە لە تێگەیشتنی ئیسلام و لەیەکڕیزی موسڵمانان.سەلام ودرودبۆ پێغەمبەر وئال‌وهاوڕێکانی".

 سرودبێژێکی شیعەکان، سوننەکان توڕە دەکات 

12ی ئەم مانگە باسم کەربەلائی، یەکێک لە بەناوبانگترین سرودبێژی شیعەکانی عێراق کە دەنگ و سرودەکانی ئەو بە سەدان ملیۆن کەس گوێی لێدەگرن، ڤیدیۆیەکی بڵاوکرایەوە کە هۆنراوەیەک دەخوێنێتەوە و ئەوەش سوننەکانی عێراق و وڵاتانی عەرەبی نیگەران کرد و تۆمەتباری دەکەن بەوەی "سوکایەتی بە هاوەڵانی پێغەمبەر کردوە و وەک باندی تاوانکاری" ناویان دەبات.

دیوانی وەقفی شیعیی دەبێت بە زویی دەستوەردان لەو بابەتەدا بکات 
لای خۆیەوە لیژنەی ئەوقاف و کاروباری ئاینیی لە پەرلەمانی عێراقیش رایگەیاند، دیوانی وەقفی شیعیی دەبێت بە زویی دەستوەردان لەو بابەتەدا بکات و رێگری بکات لەو "دەستدرێژییە بۆسەر هاوەڵانی پێغەمبەر د.خ"، بەجۆرێک رێگەنەدات دابەشبون و ناکۆکی مەزهەبی قوڵترببێتەوە.