هەواڵی ئەمڕۆ

سه‌رۆك به‌رهه‌م په‌یامێكی گرنگ ئاڕاسته‌ی گه‌لی عێراق ده‌كات

06:17 - 30/08/2022

3952جار خوێندراوەتەوە

خه‌ندان-

د. به‌رهه‌م ساڵح، سه‌رۆك كۆماری عێراق ئێوارەی ئەمڕۆ وتارێک پێشكه‌ش ده‌كات و تیایدا په‌یامێكی گرنگ سه‌باره‌ت به‌ دوایین پێشهاته‌كان ئاڕاسته‌ی گه‌لی عێراق ده‌كات.

بڕیاره‌ ئێواره‌ی ئه‌مڕۆ سه‌رۆك به‌رهه‌م وتارێك پێشكه‌ش بكات و تیایدا باسی دۆخی وڵات و دوایین به‌ره‌وپێشچونه‌كان و هاوكات په‌یامی گرنگ ئاڕاسته‌ی گه‌لی عێراق و لایه‌نه‌كان سیاسیه‌كان ده‌كات.

بۆ ماوه‌ی 24 كاتژمێر گرژیی و ئاڵۆزی و پێكدادان له‌ شه‌قامه‌كانی به‌غدای پایته‌خت رویدا.
پاشنیوه‌ڕۆی دوێنێ (29ی ئابی 2022)، موقته‌دا سه‌در، رێبه‌ری ره‌وتی سه‌در له‌ په‌یامێكدا رایگه‌یاند، به‌ ته‌واوی له‌ پڕۆسه‌ی سیاسی كشاوه‌ته‌وه‌ و هیچ ده‌ستتێوه‌ردانێك له‌ سیاسه‌تدا ناكات، راسته‌وخۆ دوای ئه‌و په‌یامه‌ لایه‌نگرانی خۆپیشاندانیان ده‌ستپێكرد و چونه‌ ناوچه‌ی سه‌وز و به‌هۆیه‌وه‌ بۆماوه‌ی 24 كاتژمێر گرژیی و ئاڵۆزی و پێكدادان له‌ شه‌قامه‌كانی به‌غدای پایته‌خت رویدا.
وڵاته‌كه‌مان به‌ هه‌لومه‌رجێكی ناهه‌موار تێده‌په‌ڕێت
ئێواره‌ی دوێنێ د. به‌رهه‌م ساڵح سه‌رۆك كۆماری عێراق له‌په‌یامێكدا بڵاویكرده‌وه‌، "وڵاته‌كه‌مان به‌ هه‌لومه‌رجێكی ناهه‌موار تێده‌په‌ڕێت، بۆیه‌ پێویسته‌ هه‌موان به‌ گیانی لێپرسراویه‌تی مامه‌ڵه‌ بكه‌ین به‌ ئاڕاسته‌ی هێوركردنه‌وه‌ی دۆخه‌كه‌ و نه‌هێڵین وڵاته‌كه‌مان به‌ره‌و دوریانێكی نادیار و مه‌ترسیدار هه‌نگاو بنێت، كه‌ هیچ كه‌س و لایه‌نێك لێی سودمه‌ندنابن".

ئه‌مڕۆش موقته‌دا سه‌در، رێبه‌ری ره‌وتی سه‌در له‌ كۆنگره‌یه‌كی رۆژنامه‌وانیدا له‌ حه‌نانه‌ رایگه‌یاند، "زۆر خه‌مبار و ماندوم به‌و دۆخه‌ی عێراق، به‌ ملكه‌چی ده‌ڕۆم و داوای لێبوردن له‌ گه‌لی عێراق ده‌كه‌م كه‌ تاكه‌ زیاندمه‌نده‌ له‌م دۆخه‌ و جارێكی دیكه‌ ده‌ڵێم بكوژ و كوژراوه‌كه‌ی ئه‌مڕۆ له‌ دۆزه‌خدان و هیوادارم خۆپیشاندانه‌كان ئاشتییانه‌ بن".
خه‌ڵك تاوانی چیه‌ له‌ دوێنێوه‌ له‌ ترس و دڵه‌ڕاوكێدایه‌، ئه‌مه‌ شۆڕش نیه‌ نه‌خێر نامانه‌وێت
رێبه‌ری ره‌وتی سه‌در داوای له‌ خۆپیشانده‌ران كرد ئه‌گه‌ر له‌ماوه‌ی 60 خوله‌كدا نه‌كشێنه‌وه‌ ئه‌وا خۆی له‌ ره‌وته‌كه‌ش بێبه‌ری ده‌كات و وتی، "خه‌ڵك تاوانی چیه‌ له‌ دوێنێوه‌ له‌ ترس و دڵه‌ڕاوكێدایه‌، ئه‌مه‌ شۆڕش نیه‌ نه‌خێر نامانه‌وێت، ده‌بێت ته‌نانه‌ت له‌ مانگرتنیش بكشێنه‌وه‌ ئه‌گه‌ر ملكه‌چمان نه‌بن هه‌ڵوێستێكی دیكه‌مان ده‌بێت، ئه‌گه‌ر خه‌می بیروباوه‌ڕی ئایینی و ئایینه‌كه‌تان نیه‌، خه‌می نیشتیمانه‌كه‌تان هه‌بێت".

دوای ئه‌و په‌یامه‌ی رێبه‌ری ره‌وتی سه‌در راسته‌وخۆ دوای په‌یامه‌كه‌ خۆپیشانده‌ران له‌ شه‌قامه‌كه‌ كشانه‌وه‌، به‌وه‌ش كۆتایی به‌ شه‌ڕو روبه‌ڕوبونه‌وه‌ هێنرا كه‌ له‌ دوێنێوه‌ ده‌ستیپێكردوه‌ و نزیكه‌ی 30 كه‌س كوژراون.