خه‌ندان-
پارتی دیموكراتی كوردستان بۆ یه‌كه‌مجار له‌وه‌ته‌ی هاوپه‌یمانی له‌گه‌ڵ ره‌وتی سه‌در پێكهێناوه دژی رێبه‌ری سه‌در ده‌وه‌ستێته‌وه و رایده‌گه‌یه‌نێت، سیستمی سیاسی ئێستا و دەستور ته‌نها به میکانیزمی دەستوریی تەوافوقی دەگۆڕدرێت، نه‌ك میزاجى شه‌خسى.
سیستمی سیاسی به میکانیزمی دەستوریی تەوافوقی دەگۆڕدرێت نه‌ك میزاجی شه‌خسی
هۆشیار زێبارى، ئه‌ندامى مه‌كته‌بى سیاسى پارتى دیموكراتى كوردستان له تویتێكدا له هه‌ژماری تایبه‌تی خۆی وه‌ڵامی پێشنیاره‌كه‌ی ره‌وتی سه‌دری دایه‌وه و نوسیویه‌تی، "سیستمی سیاسی ئێستا و دەستور تەنها به میکانیزمی دەستوریی تەوافوقی دەگۆڕدرێت نه‌ك میزاجی شه‌خسی، بەتایبەتی کە ده‌ستور زیاتر 60%ی عێراقییەکان لە ساڵی 2005دا دەنگیان لەسەرداوە و لەلایەن دەسەڵات‌و کۆمەڵگەی نێودەوڵەتیشەوە پشتیوانی دەکرێت".
خۆپیشاندانەکان ده‌رفه‌تێكی مه‌زنه بۆ گۆڕانكاری ریشه‌یی له سیسته‌می سیاسی و ده‌ستور
موقتەدا سەدر، رێبەری رەوتی سەدر لە پەیامێکدا كه شه‌وی یه‌كشه‌ممه له‌سه‌ر دوشه‌ممه (31ی ته‌موزی 2022) بڵاویكرده‌وه، نوسیویه‌تی، "خۆپیشاندانەکان ده‌رفه‌تێكی مه‌زنه بۆ گۆڕانكاری ریشه‌یی له سیسته‌می سیاسی و ده‌ستور و هه‌ڵبژاردن كه له به‌رژه‌وه‌ندی ده‌وڵه‌تی قوڵدا ساخته‌كاری تێدا ده‌كرا"، وته‌كانی به‌رپرسه‌كه‌ی پارتیش راسته‌وخۆ دوای ئه‌م په‌یامه هات.
هه‌موتان به‌رپرسن، به‌رپرسیارێتیتان له تاقیكردنه‌وه‌دایه، یان عێراقێكی ره‌گداكوتاو
سه‌در له په‌یامه‌كه‌یدا رو له خۆپیشانده‌ران ده‌ڵێت، "هه‌موتان به‌رپرسن، به‌رپرسیارێتیتان له تاقیكردنه‌وه‌دایه، یان عێراقێكی ره‌گداكوتاو، یان عێراقێكی شوێنكه‌وته، كه گه‌نده‌ڵان و به‌دوكه‌وتوان و ئه‌وانه‌ی خاوه‌نی ته‌ماعكاری دنیایین و له لایه‌ن ده‌ستی رۆژئاوایی و رۆژهه‌ڵاتییه‌وه جوڵه‌یان پێده‌كرێت".
په‌یامه‌كه‌ی ئه‌مشه‌وی هۆشیار زێباری یەکەم ڤیتۆیه له دژی بەیاننامەکەی موقتەدا سەدر
هاوكات رۆژنامه‌نوس مه‌حمود یاسین كوردی ده‌ڵێت، په‌یامه‌كه‌ی ئه‌مشه‌وی هۆشیار زێباری یەکەم ڤیتۆیه له دژی بەیاننامەکەی موقتەدا سەدر سەبارەت بە گۆڕینی سیستەمی سیاسی عێراق و هەمواکردنەوەی دەستور.
مەسعود بارزانی و نەوشیروان مستەفا لە ماددەی 142ی دەستوری عێراق لە بڕگەی چواردا بۆمبێکی تەوقیتکراوییان داناوە
رونیشیكردوه‌ته‌وه، "مەسعود بارزانی و نەوشیروان مستەفا لە ماددەی 142ی دەستوری عێراق لە بڕگەی چواردا بۆمبێکی تەوقیتکراوییان داناوە، كه بۆ ئەو کاتە زۆر زیرەکانەیە، ئەویش ئەگەر لە دوایین پڕۆسەی هەموارکردنەوەی دەستور دو لەسەر سێی سێ پارێزگای عێراق هەموارکردنەوەی دەستور رەتبکەنەوە، ئیتر هەموارکردنەوەکە شکست دەهێنێت، واتە ئەگەر دو لە سەر سێی هەولێر، سلێمانی و دهۆک رازی نەبن با موقتەدا یان هه‌رلایه‌نێكی دیكه بچن دەستور بگۆڕن، هیچ قیمەتی نییە".
ئه‌گه‌ر سیستەمی سیاسی عێراق بکرێتە سەرۆکایەتی، هه‌رگیز کورد و سوننە ناتوانن لە عێراق ببنە زۆرینه
به‌بڕوای ئه‌و رۆژنامه‌نوسه، "ئه‌گه‌ر سیستەمی سیاسی عێراق بکرێتە سەرۆکایەتی، هه‌رگیز کورد و سوننە ناتوانن لە عێراق ببنە زۆرینه و 50+1 دروستبكه‌ن، ئیتر موقتەدا سه‌در دەیەوێت سەرۆک دابنێت و خۆشی ببێتە رابەر وەکو سەید عەلی خامەنەیی".
کۆماری عێراق لە ساڵی 1921 دامەزراوە، لە سەرەتای دامەزراندنییدا لەسەر شێوازی سیستمی حوکمڕانی پاشایەتی بو، لە ساڵی 1958 بە سەرکەوتنی شۆڕشی 14ی تەمموز سیستمی کۆماری بەرقەرار بو، لە ساڵانی 1958 بۆ 1968 چەندین کودەتای سەربازی لە عێراقدا ئەنجامدران، کە دوایینیان کودەتای بەعسییەکان بو، ڕژێمی بەعس لە ساڵی 1968 تاوه‌كو 2003، دەسەڵاتی عێراقی بە دەستەوە بو.
ھێرشی ئەمریکا به‌سه‌رۆكایه‌تی هاوپه‌یمانان بۆ سەر عێراق لە ساڵی 2003دا، بە خاڵی گۆڕان لە عێراقدا بەتایبەتی و ناوچەکە بە گشتی دادەنرێت
ھێرشی ئەمریکا به‌سه‌رۆكایه‌تی هاوپه‌یمانان بۆ سەر عێراق لە ساڵی 2003دا، بە خاڵی گۆڕان لە عێراقدا بەتایبەتی و ناوچەکە بە گشتی دادەنرێت، ئەم شەڕە بوه‌ھۆی زیانێکی گیانی زۆر لە ڕیزی خەڵکی مەدەنیی عێراقییدا، بۆشایییەک لە ئاسایشی عێراقدا دروست بو، كه له ساڵی 2014دا بوه‌هۆی سه‌رهه‌ڵدانی داعش و به‌هۆی ئه‌و رێكخراوه‌شه‌وه به‌شێك له شاره‌كانی عێراق وێرانبون و تا ئێستاش ئاوه‌دان نه‌كراونه‌ته‌وه.