هەواڵی ئەمڕۆ

بەڕێوەبەری حەج و عومرەی هەرێم: گیرخواردنی حاجیان لە ئوردن پەیوەندی بە ئێمەوە نییە

01:33 - 20/07/2022

2072جار خوێندراوەتەوە

خەندان-

بەڕێوەبەری حەج و عومرەی هەرێم رایگەیاند، کێشەی ئەو حاجیانەی لە فڕۆکەخانەی ئوردن کێشەیان بۆ دروستبوە و ماوەی سێ رۆژە لەو وڵاتە گیریان خواردوە  و رێگەیان پێنادرێت بگەڕێنەوە کاری ئەوان نییە و پێویستە داوای هاوکاری لە فەرمانگەی دەرەوەی پەیوەندییەکانی حکومەتی هەرێم بکەن.

لەئێستادا دەست بە گەڕاندنەوەی حاجیان کراوە لە فڕۆکەخانەی مەدینەوە بۆ فڕۆکەخانەکانی سلێمانی و هەولێر

شێخ نیاز نەقشبەندی، بەڕێوەبەری حەج و عومرەی هەرێم، ئەمڕۆ چوارشەممە، بە خەندان-ی راگەیاند،"ئێمە وەک بەڕێوەبەرایەتی حەج نزیکەی 1800 حاجیمان لە فڕۆکەخانەی نێودەوڵەتی سلێمانی و هەولێرەوە رەوانەی عەرەبستانی سعودی کردوە بەمەبەستی بەجێهێنانی فەریزەی حەج، لەئێستاشدا دەست بە گەڕاندنەوەی ئەو حاجیانە کراوە لە فڕۆکەخانەی مەدینەوە بۆ فڕۆکەخانەکانی سلێمانی و هەولێر، هیچ کامیان ترانزێتیان نییە".

 ئێمە ئاگاداری نین و پەیوەندیشی بە ئێمەوە نییە

ئاماژەی بەوەشکرد،"ئەوەی دەوترێت ژمارەیەک حاجی لە فڕۆکەخانەی ئوردن گیریان خواردوە  ورێگەیان پێنادرێت بگەڕێنەوە، ئێمە ئاگاداری نین و پەیوەندیشی بە ئێمەوە نییە، پێدەچێت بە حەجی بازرگانی پێشتر رۆیشتبن، پێویستە داوای هاوکاری لە فەرمانگەی پەیوەندیەکانی دەرەوەی هەرێم بکەن و کێشەکەیان چارەسەر بکەن".

لە 18ی ئەم مانگەوە دەست بە گەڕاندنەوەی حاجیانی هەرێمکراوە

پێشتر نەبەز ئیسماعیل، وتەبێژی وەزارەتی ئەوقاف و کاروباری ئاینی هەرێم، بە خەندان-ی راگەیاندبو،"لە 18ی ئەم مانگەوە دەست بە گەڕاندنەوەی حاجیانی هەرێم کراوە، بە شەش وەجبە تا 24ی ئەم مانگە تەواوی حاجیان دەگەڕێنرێنەوە".

 بە بیانوی توشبونیان بە کۆرۆنا لە فڕۆکەخانەی ئوردن هێڵراونەتەوە و رێگریان لێدەکرێت بگەڕێنەوە

ئەمە لەکاتێکدایە، ماوەی سێ رۆژە 23 حاجی، کە سەرجەمیان خەڵکی هەولێرن، بە بیانوی توشبونیان بە کۆرۆنا لە فڕۆکەخانەی ئوردن هێڵراونەتەوە و رێگریان لێدەکرێت بگەڕێنەوە.

یەکێک لەو حاجیانەش رایگەیاندوە، پاسپۆرتەکانیان لێوەرگیراوە و لە هۆتێلێک هێڵراونەتەوە و رێگەیان پێنادرێت بێنەدەرەوە و پێیان وتون با وڵاتەکەیان کێشەکەیان بۆ چارەسەربکات.