سەرۆکی زانکۆی سەڵاحەدین نوێترین زانیاری لەبارەی بکوژی دو مامۆستاکە ئاشکرادەکات

11:20 - 29/06/2022

5898جار خوێندراوەتەوە

خەندان-

سەرۆکی زانکۆی سەڵاحەدین رایگەیاند، ئەو خوێندکارەی هەستاوە بە تیرۆرکردنی ئەو دو مامۆستایە یاداشتێکی پێشکەشی وەزارەتی خوێندنی باڵا کردوە و لە مانگی (نیسان/4) ئەمساڵ لەرێگەی لیژنەیەکەوە رەزامەندی دراوە بە گەڕانەوەی بۆ زانکۆی سەڵاحەدین یان سۆران، بەڵام بەهۆی ئەوەی دو ساڵە لە خوێندن دابڕاوە، بۆ گەڕانەوەی بۆ زانکۆ پێویستی بە بڕیارێک بو كه‌ له‌ ده‌سه‌ڵاتی خوێندنی باڵادا بوه‌.

د.کامەران یونس، سەرۆکی زانکۆی سەڵاحەدین ئەمڕۆ چوارشەممە لە کۆنفرانسێکی رۆژنامەوانیدا رایگەیاند، "سەری رێز بۆ گیانی هەردو مامۆستای زانکۆکەمان (د.کاوان ئیسماعیل- راگری کۆلێژی یاسا) و (د.ئیدریس عیزەت حەمەخان- مامۆستای کۆلێژی ئەندازیاری) دادەنەوێنین، ئەمە کارەساتێکی جەرگبڕ بو، کارەساتێک بو نەک شاری هەولێر بەڵکو گشت کوردستانی تاساند، هەرسێ سەرۆکایەتیەکەی هەرێم بەیاننامەی خۆیان لەبارەوە بڵاوکردەوە".

 ئێمە بڕیارمانداوە، بە داگرتنی ئاڵاکانی ناو زانکۆ بۆ ماوەی سێ رۆژ

ئاماژە بەوەشکرد، "ئێمە بڕیارمانداوە، بە داگرتنی ئاڵاکانی ناو زانکۆ بۆ ماوەی سێ رۆژ، راگرتنی سەرجەم چالاکی و بۆنەکان، جگە لە تاقیکردنەوەکانی خولی دوەم کە لە دو کۆلێژ ماون".

 داوکارین هەرچی زوە تاوانبار بهێنرێتە دادگا و دادگایی بکرێت

د.کامەران یونس باسی لەوەشکرد، "ئێمە وەک زانکۆ تیمێکی پارێزەران رادەگەیەنین، ئەم کەیسە دەبێتە کەیسی زانکۆی سەڵاحەدین، داوکارین هەرچی زوە تاوانبار بهێنرێتە دادگا و دادگایی بکرێت، دوپاتیشی دەکەینەوە کە گیانی مامۆستایان و خوێندکاران پارێزراو دەبن".

ئەو خوێندکارە دو ساڵە لە خوێندن دابڕاوە، دەبێت یاسایەک رێنماییەک هەبێت بۆ ئەوەی ئەو دو ساڵەی چۆن بۆ هەژماربکرێت

ئاشکراشیکرد، "ئەو خوێندکارەی هەستاوە بە تیرۆرکردنی ئەو دو مامۆستایە، یاداشتێکی پێشکەشی وەزارەتی خوێندنی باڵا کردوە، ئەوانیش پێشکەشی سەرۆکایەتی زانکۆی سەڵاحەدینیان کردوە، لەوێشەوە رەوانەی راگرایەتی کۆلێژی یاسا کراوە، لە رێکەوتی4ی(ئازار/3)ی 2021، نوسراوی لارینەبونی بۆ وەرگرتنی ئەو خوێندکارە ئاراستە کردوە، بەڵام ئەو خوێندکارە دو ساڵە لە خوێندن دابڕاوە، دەبێت یاسایەک رێنماییەک هەبێت بۆ ئەوەی ئەو دو ساڵەی چۆن بۆ هەژماربکرێت، ئەوەش لە دەسەڵاتی زانکۆ نییە و لە دەسەڵاتی وەزارەتە".

 لاریان نییە ئەو خوێندکارە لە زانکۆی سەڵاحەدین بێت یان زانکۆی سۆران درێژە بە خوێندن بدات

بەوتەی سەرۆکی زانکۆی سەڵاحەدین،" لەمانگی (نیسان/4)ی ئەمساڵ، وەزارەت لەرێگەی لیژنەیەکەوە بڕیاریداوە، لاریان نییە ئەو خوێندکارە لە زانکۆی سەڵاحەدین بێت یان زانکۆی سۆران درێژە بە خوێندن بدات".

بەیانیی دوێنێ سێشه‌ممه‌ دو مامۆستای زانکۆی سەڵاحەدین لە هەولێر له‌لایه‌ن خوێندكارێكه‌وه‌ کوژران، سه‌ره‌تا خوێندكاره‌كه‌ بەهۆی ئەوەی لە زانکۆکەی خۆی فەسڵ کراوە و لە زانکۆی سەڵاحەدینیش وەرنەگیراوە، چوەتە زانکۆی سەڵاحەدین و هێرشیکردوەتە سەر راگری کۆلێژی یاسای زانکۆکە و پاسەوانێک، هەردوکیان برینداربون و دواتر راگری کۆلێژی یاسا مردوه‌، دواتریش  هێرشی کردوەتە سەر ماڵی د. ئیدریس عیزەت حەمەخان، مامۆستای کۆلێژی ئەندازیاریی زانکۆی سەڵاحەدین و كوشتویه‌تی.