هەواڵی ئەمڕۆ

وەزارەتی رۆشنبیری هەرێم هۆشداری دەداتە کەناڵەکانی راگەیاندن

09:30 - 26/06/2022

2717جار خوێندراوەتەوە

خەندان-
وەزارەتی رۆشنبیری هەرێم رایدەگەیەنێت، لەم بارەی هەستیارەی ئێستادا کە هەرێمی کوردستان وەک قەوارەیەک لەلایەن نەیارانییەوە روبەڕوی چەندین شێوازی دوژمنکاریانەی پڕ مەترسی بوەتەوە، کەناڵەکانی راگەیاندن پێویستە خۆیان بە دوربگرن لە بڵاوکردنەوەی ئەو بابەتانەی دەبنە هۆی دروستکردنی ترس و گومان لەسەر سەقامگیری هەرێم دروست دەکەن.

خۆیان بە دوربگرن لە بڵاوکردەنەوەی هەر بابەتێک کە دژی قەوارەی هەرێمی کوردستان

بەگوێرەی نوسراوێکی وەزارەتی رۆشنبیری و لاوانی هەرێم، کە وێنەیەکی دەست خەندان کەوتوە، تێیدا هاتوە،" ئاگاداری گشت میدیا بینراو و بیستراو و پۆرتاڵ و رایەڵە ئەلیکترۆنییەکان دەکەینەوە، کە خۆیان بە دوربگرن لە بڵاوکردەنەوەی هەر بابەتێک کە دژی قەوارەی هەرێمی کوردستان، دروستکردنی ترس و گومان بێت لەسەر سەقامگیری هەرێمەکەمان".

بڵاوکردنەوەی ئەم جۆرە بابەتانە ناچنە چوارچێوەی ئازادی رادەربڕینەوە

هەر لە نوسراوەکەدا هاتوە،" لەم بارەی هەستیارەی ئێستادا کە هەرێمی کوردستان وەک قەوارەیەک لەلایەن نەیارانییەوە روبەڕوی چەندین شێوازی دوژمنکاریانەی پڕ مەترسی بوەتەوە، بڵاوکردنەوەی ئەم جۆرە بابەتانە ناچنە چوارچێوەی ئازادی رادەربڕینەوە".

وەزارەتمان ئەرکی خۆیەتی، کە رێکاری یاسایی توند بەرامبەر سەرپێچیکارانی یاسا و رێنماییەکان بگرێتە بەر

لەبەشێکی دیکەی نوسراوەکەدا ئاماژە بەوەدراوە،" لەم کاتەدا ئەم هەڵسوکەوتە نابەرپرسانەیە  لەلایەن هەر دەزگا و رایەڵەیەکی میدیاییەوە بکرێت، دورە لە یاسا و لۆژیک و پێچەوانەی ماددەی سێیەم /بڕگەی سێیەمە لە (رێنمانیی رێکخستنی فریکوێنسی سپەیس لە هەرێمی کوردستان)، بۆیە وەزارەتمان ئەرکی خۆیەتی، کە رێکاری یاسایی توند بەرامبەر سەرپێچیکارانی یاسا و رێنماییەکان بگرێتە بەر".