عەلی حەمەساڵح: داهاتی پێویست بۆ موچە لەبەردەستە و پێویستە دابەشکردنی دەستپێبکات

08:38 - 26/06/2022

1636جار خوێندراوەتەوە

خەندان-

عەلی حەمەساڵح، پەرلەمانتاری کوردستان رایگەیاند، پارەی پێویست بۆ موچەی یەک مانگی فەرمانبەران بڕی 620.000.000  (شەش سەد و بیست ملیۆن)دۆلارە، لەئێستادا ئەو پارەیە لەبەردەستدایە و پێویستە دەست بە دابەشکردنی بکرێت.

هاوپەیمانان بڕی 22.000.000 ( بیست و دو ملیۆن) دۆلاری دابین دەکەن و راستەوخۆ موچەی وەزارەتی پێشمەرگەی پێدەدرێت

عەلی حەمەساڵح، پەرلەمانتاری کوردستان، ئەمشەو لە لاپەڕەی تایبەتی خۆی لە فەیسبوک بڵاویکردوەتەوە،" پارەی پێویست بۆ موچەی یەک مانگی فەرمانبەران بڕی 620.000.000  (شەش سەد و بیست ملیۆن)دۆلارە، هاوپەیمانان بڕی 22.000.000 ( بیست و دو ملیۆن) دۆلاری دابین دەکەن و راستەوخۆ موچەی وەزارەتی پێشمەرگەی پێدەدرێت، ئەوەی دەمێنێتەوە لەسەر حکومەتی هەرێم بڕی 598.000.000( پێنج سەدو نەوەد و هەشت ملیۆن) دۆلارە پێویستە دابینی بکات".

ئەو داهاتەی نەوت کە بۆ موچە بەکاردێت 500.000.000( پێنجسەد ملیۆن دۆلار) ە لەئێستادا بەردەستە

ئاماژەی بەوەشکردوە،" ئەو داهاتەی نەوت کە بۆ موچە بەکاردێت 500.000.000( پێنجسەد ملیۆن دۆلار) ە لەئێستادا بەردەستە، داهاتی ناخۆش نزیکەی 218.000.000( دوسەد و هەژدە ملیۆن)دۆلارە، لەو بڕەش 98.000.000 ( نەوەد و هەشت ملیۆن) دۆلاری بۆ موچەیە، کە 42.000.000 (چل و دو ملیۆن)دۆلاری داهاتی سلێمانییە و 56.000.000( پەنجا و شەش ملیۆن)دۆلاری داهاتی هەولێرە".

پێویستە دابەشکردنی موچە دەستپێبکات

ئاشکراشیکردوە،" ئێستا بۆ موچەی مانگی حوزەیران/ 6ی 2022 داهاتی پێویست لەبەردەستەو پێویستە دابەشکردنی موچە دەستپێبکات".

ئەمە لەکاتێکدایە سه‌رچاوه‌یه‌كی تایبه‌ت له‌ وه‌زاره‌تی دارایی به‌ خه‌ندان-ی راگه‌یاندوە،  هه‌رچه‌ند به‌ فه‌رمی تا بڕیار له‌سه‌ر دابه‌شكردنی موچه‌ی مانگی (حوزه‌یران/6)ی 2022ی فه‌رمانبه‌ران نه‌دراوه‌، به‌ڵام هاوشێوه‌ی مانگه‌كانی رابردو ده‌بێت و ره‌نگه‌ چه‌ند رۆژێك به‌هۆی هاتنی جه‌ژنی قوربانه‌وه‌ پێشبخرێت، به‌وه‌ش له‌ كۆتایی ئەم هەفتەیە یاخود سه‌ره‌تای هه‌فته‌ی داهاتوه‌وه‌ ده‌ست به‌دابه‌شكردنی ده‌كرێت.