حاجییەکی کورد لە مەککە رەوانەی نەخۆشخانە کرا

07:54 - 26/06/2022

1100جار خوێندراوەتەوە

خەندان-

 

بەڕێوەبەری گشتی حەج و عومرەی کوردستان رایگەیاند، سەرجەم  کاروانی حاجیانی هەرێمی کوردستان گەیشتونەتە شاری مەککە، دەشڵێت،  دەشڵێت، حاجییەک لە رێگەی لیژنەی پزیشکی حاجیانەوە ڕەوانەی نەخۆشخانە کراوە و لە ئێستادا لەژێر چاودێری پزیشکیدایە.

ئەمڕۆ یەکشەممە  دوا کاروانی حاجیانی هەرێمی کوردستان گەیشتنە شاری مەککەی پیرۆز

شێخ نیاز راغب نەقشبەندی،  بەرێوەبەری گشتی حەج و عومڕەی هەرێمی کوردستان بڵاویکردوەتەوە،" ئەمڕۆ یەکشەممە  دوا کاروانی حاجیانی هەرێمی کوردستان گەیشتنە شاری مەککەی پیرۆز و لە لایەن لیژنەی پێشوازی حاجیان بەخێرهاتیان کرا و دواتر پەیتا پەیتا بەرەو کەعبەی پیرۆز بەرێکەوتن بەمەبەستی بەجێگەیاندنی ئەرکە ئایینەکانیان".

یەک حاجی کوردستان لە رێگەی لیژنەی پزیشکی حاجیانەوە ڕەوانەی نەخۆشخانە کراوە

ئاماژەی بەوەشکردوە،" تاوەکو ئێستا تەواوی حاجیانی هەرێمی کوردستان سەلامەتن و هیچ حاڵەتێکی مردن لە نێو حاجیانی کوردستاندا تۆمار نەکراوە، تەنها یەک حاجی کوردستان لە رێگەی لیژنەی پزیشکی حاجیانەوە ڕەوانەی نەخۆشخانە کراوە و لە ئێستادا لەژێر چاودێری پزیشکیدایە.

هەرچییەک پێویست بێت بۆ خزمەتکردنی حاجیان ئەنجامی دەدەن

باسی لەوەشکرد،" سەرجەم بەرێوەبەر و فەرمانبەران و موفتی ومورشیدی ئایینی و لیژنەی پزیشکی و خاوەن کۆمپانیاکان تاوەکو ئێستا توانیویانە بەو پەڕی لەخۆبوردەییەوە خزمەتی حاجیان بکەن، هەرچییەک  پێویست بێت بۆ خزمەتکردنی حاجیان ئەنجامی دەدەن".

بۆ ئەمساڵ بڕیارە یەک ملیۆن کەس لەسەرانسەری جیهانەوە بەشداری لەمەراسیمی حەجدا بکەن، کە لەو ژمارەیەش نزیکەی دو هەزار حاجی لە هەرێمی کوردستانەوە رویان لە عەرەبستانی سعودیە کردوە.