هەواڵی ئەمڕۆ

روسیا: هەڵوێستمان بەرامبەر چونی فینلاند بۆ ناو ناتۆ سەربازیی و چاوەڕواننەکراو دەبێت

08:48 - 18/05/2022

13673جار خوێندراوەتەوە

خەندان-

ماریا زاخارۆڤا، وتەبێژی وەزارەتی دەرەوەی روسیا رایگەیاند، هەڵوێستی وڵاتەکەی بەرامبەر بڕیاری فینلاند بۆ چونەناو هاوپەیمانی ناتۆ، هەڵوێستێکی سەربازیی دەبێت و ئەو بابەتەش سوپای وڵاتەکەیان بڕیاری لەبارەوە دەدات.

رێکارەکانمان بەرامبەر فینلاند سەرسوڕهێنەر و چاوەڕواننەکراو دەبن
ماریا زاخارۆڤا لە وەڵامی پرسیارێکی رۆژنامەنوساندا لەبارەی ئەو رێکارە سەربازییانەی بەرامبەر فینلاند دەیگرنەبەر دوای ئەوەی داواکاریی بۆ ئەندامبونی لە ناتۆ پێشکەش کرد، رایگەیاند، "رێکارەکانمان سەرسوڕهێنەر و چاوەڕواننەکراو دەبن".
ئەو بابەتە زیاتر پەیوەستە بە سوپاوە بە پلەی یەکەم
ئاماژەی بەوەشکرد، "ئەو بابەتە دەگەڕێتەوە بۆ وەزارەتی بەرگری روسیا، بڕیارەکەش لەسەر بنەمای هەمو ئەو هۆکارانە دەدرێت کە پەیوەستن بە بەرەوپێشچونی هەنگاوەکانی تایبەت بە ئەندامبونی فینلاند لە ناتۆ، ئەو کاتە بە قۆناغ بڕیار و رێکار دەگرینەبەر، بەڵام وەک باسمان کرد ئەو بابەتە زیاتر پەیوەستە بە سوپاوە بە پلەی یەکەم".
تورکیا لە دژی بڕیاری بە ئەندامبونی ئەو دو وڵاتە وەستایەوە
رۆژی چوارشەممە سوید و فینلاند داواکارییان بۆ ئەندامبونیان لە ناتۆ بەرزکردەوە، داواکارییەکە لەلایەن زۆرینەی ئەندامانی رێکخراوەکە بە گەرمی پێشوازی لێکرا، بەڵام تورکیا لە دژی بڕیاری بە ئەندامبونی ئەو دو وڵاتە وەستایەوە، ئەوەش وایکرد ناتۆ نەتوانێت دەست بە رێکارە پێویستەکان بکات.

نیشانەکردن

فینلاند روسیا