عەممار حەکیم لەبارەی گۆڕە بەکۆمەڵەکان داوایەک ئاڕاستەی حکومەتی عێراق دەکات

10:46 - 16/05/2022

923جار خوێندراوەتەوە

خەندان-

عەممار حەکیم، سەرۆکی رەوتی حیکمەی نیشتیمانی رایگەیاند، سیاسەتی رژێمی بەعسی روخاو و گروپی چەکدارانی داعش هاوشێوەن کە جیاوازی لەنێوان ژن، منداڵ، گەنج و بەساڵاچواندا ناکەن و هەمویان زیندەبەچەڵ دەکەن، بۆیە داوا لە حکومەتی عێراق دەکات سود لە شارەزایی جیهانی وەربگرێت بۆ هەڵدانەوەی گۆڕە بەکۆمەڵەکان بەئامانجی پاراستنی ناسنامەی روفاتەکان.

عەممار حەکیم لە پەیامێکدا ئاماژەی بەوەشکرد، لە ڕۆژی نیشتمانیی گۆڕە بەکۆمەڵەکاندا، ڕەهەندەکانی ئەو نادادپەروەرییەی کە لە سەردەمی دیکتاتۆرییەتدا بەسەر گەلی عێراقدا رویدا یاد دەکەنەوە، بەجۆرێک دەبینن ناشتنی بەکۆمەڵی ژن، منداڵ، گەنج و بەساڵاچوان بەسەر نەخشەی وڵاتدا دابەشکراوە.

داعش پەیڕەوی لە هەمان سیاسەتی کۆمەڵکوژی دەکات
ئاماژەی بەوەشکردوە، لەم کاتەشدا گروپی چەکدارانی داعش لەرێگەی کوشتن و بەئامانجگرتنی ژن، منداڵ، گەنج و بەساڵاچوان پەیڕەوی لە هەمان سیاسەتی کۆمەڵکوژی دەکات.
 داوا لە لایەنە پەیوەندیدارەکان دەکات کە سود لە شارەزایی جیهانی وەربگرن 
عەممار حەکیم دەڵێت، داوا لە لایەنە پەیوەندیدارەکان دەکات سود لە شارەزایی جیهانی وەربگرن بۆ مامەڵەکردن لەگەڵ گۆڕە دۆزراو و نەدۆزراوەکان، بەجۆرێک بە شێوەیەکی تەکنیکی کاربکرێت بۆ ڕێگریکردن لە دیارنەمانیان یان لەدەستدانی ناسنامەی قوربانییەکانیان.

نیشانەکردن

عێراق