داوای رێگری گەشتکردن لە بەرپرسێکی عێراقی دەکرێت

04:43 - 14/05/2022

1092جار خوێندراوەتەوە

خەندان-
ئەندامێکی ئەنجومەنی نوێنەرانی عێراق داوادەکات رێگری گەشتکردن لە ئەمینداری بەغداد بکرێت، دەشڵێت، سبەی ئەو بەڵگەنامەی یاساییانەی لەسەری هەبون لە رابردودا رادەستی دادگای دەکات.

ئەم هەڵوێستەی سەرۆک وەزیران بەرز دەنرخێنین

ئەمڕۆ شەممە، عالییە نوسەیف ئەندامی ئەنجومەنی نوێنەرانی عێراق لە کۆنفرانسێکی رۆژنامەوانیدا رایگەیاند،"هەواڵی دورخستنەوەی (عەلا موعن)ئەمینداری بەغدادمان لە پۆستەی بیست لەلایەن سەرۆکی ئەنجومەنی وەزیرانەوە، ئەم هەڵوێستەی سەرۆک وەزیران بەرزدەنرخێنین، کە لە رابردودا چەند جارێک لەسەر ئەو پرسە کۆبونەوەمان کردوە زۆر هاوکار بوە، بەڵام بە گۆڕینی ئەمینداری بەغداد ئەمە کۆتایی نایات".

بەداخەوە پارێزگای بەغداد بەهۆی ئەم ئەمیندارەوە بوە بە گوندێک و روکاری شارستانی تێدا کەمبوەتەوە

رونیشیکردوەتەوە،" بەداخەوە پارێزگای بەغداد بەهۆی ئەم ئەمیندارەوە بوە بە گوندێک و روکاری شارستانی تێدا کەمبوەتەوە، کە زۆرترین پێشێلکاری کردوە بەراورد بە پاڕێزگاکانی دیکە، لەگەڵ ئەوەی سوپاسی سەرۆک وەزیران دەکەین، بەڵام بڕیار بو یەکشەممە یان دوشەممە ناوبراو بانگ بکەن بۆ لێپرسینەوە، وەک بینیتان بڕیاری دورخستنەوەی سەرکرد، لەگەڵ ئەوەشدا هیوادارین، هەمو رێوشوێنە یاساییەکان وەک خۆی بەرامبەری بگیرێتە بەر".

دوای دورخستنەوەی ئەمینداری بەغداد سەرجەم بەڵگە یاساییەکان رادەستی دەسەڵاتی دادوەری دەکەم

ئاشکراشیکرد،"دوای دورخستنەوەی ئەمینداری بەغداد سەرجەم بەڵگە یاساییەکان رادەستی دەسەڵاتی دادوەری دەکەم، بەرگری لەسەرجەم ئەو فەرمانبەرانە دەکەم بەهۆی ئەوەوە رێوشوێنی خراپ لە دژیان گیراوەتە بەر، داوا لە سەرۆک وەزیران دەکەم بە سەرجەم ئەو بڕیارانەدا بچێتەوە کە لەلایەن ناوبراوەوە دراون لە رابردودا".

پێویستە سەرۆک وەزیران بڕیاری قەدەغەی گەشت لە دژی ئەمینداری بەغداد دەربکات

جەختیلەوەشکردەوە،"پێویستە سەرۆک وەزیران بڕیاری قەدەغەی گەشت لە دژی ئەمینداری بەغداد دەربکات، هاوکار بێت لەگەڵ دەسەڵاتی دادوەری، ەک لەسبەیەوە بەڵگەنامەکانیان رادەست دەکەین".

دوێنێ هەینی، مستەفا کازمی، سەرۆک وەزیرانی عێراق بەهۆی تێوەگلانی لە کەیسی گەندەڵی و خراپ بەڕێوەبردنی ئیداری لەسەر داوای ژمارەیەک پەرلەمانتار، بڕیاری دورخستنەوەی لە پۆستکەیە بۆ عەلا موعن ئەمینداری بەغداد دەرکرد.