هەواڵی ئەمڕۆ

باڵیۆزی تورکیا لە بەغدا: ھێندەی تورکیا، گرنگی بە گەشەسەندنی عێراق دەدەین

03:11 - 14/05/2022

1177جار خوێندراوەتەوە

خه‌ندان-

باڵیۆزی تورکیا لە بەغدا رایگه‌یاند، کۆمپانیا تورکییەکان رۆڵی سەرەکی سەرکەوتنی گەورەی گەشەپێدانن لە بەغدا و بەمنزیکانە قوتابخانەکانی مەعاریفی لە ئەنبار دەکەنەوە، ده‌شڵێت، "وڵاته‌كه‌ی هێنده‌ی توركیا، گرنگی بە گەشەسەندنی عێراق دەدەن".

عەلی رەزا گونەی، باڵیۆزی تورکیا لە بەغدا بەشداری لە کۆبونەوەی نوێنەرانی جیھانی بازرگانی تورکیا و عێراق کرد، کە لە باڵەخانەی دیوانی پارێزگای ئەنبار بەڕێوەچو، دوای کۆبونەوەکەی لەگەڵ  عەلی فەرحان دلێمی، پارێزگاری ئەنبار کۆنگرەیەکی رۆژنامەوانی ھاوبەشیان ئەنجامدا.

ئەنبار شارێکی نمونەییە کە توانی بەرامبەر بە رێکخراوی تیرۆریستیی داعش لەسەر پێی خۆی بوەستێت
باڵیۆزی تورکیا لە بەغدا له‌ كۆنگره‌كه‌دا رایگه‌یاند، سەردانی پارێزگاکانی نەجەف، کەربەلا، بەسرە، کەرکوک و نەینەوای-ی کردوە و "ئەنبار بۆ ئێمەش گرنگە، بۆیە ئەمڕۆ ویستمان ئەم پارێزگایەش بەسەر بکەینەوە، ئەنبار شارێکی نمونەییە کە توانی بەرامبەر بە رێکخراوی تیرۆریستیی داعش لەسەر پێی خۆی بوەستێت، خەڵکی ئەنبار دوای ئەو وێرانکارییەی کە لە لایەن داعشەوە ھاتە ئاراوە، چیرۆکێکی سەرکەوتنی گرنگ و نمونەیییان بۆ گەلی عێراق نوسییەوە".
کۆمپانیا بەناوبانگەکانی تورکیا لە بوارە جیاجیاکانی وەک تەندروستی، بانکی، وزە، ئاو، دروستکردنی رێگاوبان ئامادەی کۆبونەوەکان بون
ئاماژه‌ی به‌وه‌شكرد، لەگەڵ ژمارەیەک لە گەورە بازرگانان ھاتون بۆ بەشداریکردن لە پڕۆژەکانی گەشەپێدان لە ئەنبار و نوێنەری کۆمپانیا بەناوبانگەکانی تورکیا لە بوارە جیاجیاکانی وەک تەندروستی، بانکی، وزە، ئاو، دروستکردنی رێگاوبان ئامادەی کۆبونەوەکان بون.
کۆمپانیا تورکییەکان رۆڵی سەرەکی سەرکەوتنی گەورەی گەشەپێدانن لە بەغدا
باڵیۆزی تورکیا لە بەغدا جەختی لەوەکردەوە، کە "کۆمپانیا تورکییەکان رۆڵی سەرەکی سەرکەوتنی گەورەی گەشەپێدانن لە بەغدا و بەم نزیکانە قوتابخانەکانی مەعاریفی لە ئەنبار دەکەنەوە و ئێمە هێنده‌ی گەشەسەندنی تورکیا، گرنگی بە گەشەسەندنی عێراق دەدەین، رابردومان یەکبوە و داھاتوشمان یەک دەبێت".

ھەر لە میانی کۆنگرە رۆژنامەوانییەکەدا عەلی فەرحان دلێمی، پارێزگاری ئەنبار باسی لە بونی کۆمپانیاکانی وەبەرھێنانی تورکیا کرد لە ئەنبار و ئاماژەی بەوە کرد، کە دەیانەوێت لە بواری وەبەرھێنان و پیشەسازی و کەرتی تایبەت و بوارەکانی دیكه‌ی گەشەپێداندا زیاتر سوود لە ئەزمونی ئەو کۆمپانیایانە وەربگرن.

نیشانەکردن

تورکیا عێراق