سەندیكای هونەرمەندان: ناسر ڕەزازی پارێزەری سرودە نیشتمانییەکانە و پشتیوانی دەکەین

08:49 - 09/02/2022

15232جار خوێندراوەتەوە

خەندان-

سەندیكای هونەرمەندانی کوردستان رایگەیاند، داوا لە كۆمەڵانی خەڵكی كوردستان دەکەن بەهۆشیارییەوە مامەڵە لەگەڵ ئەو جۆرە وتار و بانگەشانەدا بكەن كە هونەر و هونەرمەندان دەكەنە ئامانج، جەختیش دەکاتەوە لەوەی پشتیوانی هونەرمەند ناسر ڕەزازی دەکەن کە "پارێزەری سرودە نیشتمانییەکانە."

ڕەزازیی هونەرمەندێكی بەئەزمون و پڕ بەخشش و داهێنانە

سەندیكای هونەرمەندانی کوردستان لەراگەیەنراوێکدا باسی لەوەشکردوە، "ماوەیەكە چەند كەسێك بەشێوەیەكی ناشارستانی و پڕلەقین هێرشی ناڕەوا دەكەنەسەر هونەرمەند ناسری ڕەزازی. لەکاتێکدا ڕەزازیی هونەرمەند، پێشمەرگە و نیشتمانپەروەر لەپاڵ هەڵوێستە سیاسییە كوردستانییەكانیدا، هونەرمەندێكی بەئەزمون و پڕ بەخشش و داهێنانە".

بەهۆشیارییەوە مامەڵە لەگەڵ ئەو جۆرە وتارانەدا بكەن كە هونەر و هونەرمەندان دەكەنە ئامانج

ئەوەش خراوەتەڕو،  ناسر ڕەزازی "یەكێكە لە پارێزەران و درێژەپێدەرانی ڕەوتی گۆرانی و ئاواز و سرودە نیشتمانییە ڕەسەنەكان. بۆیە وێڕای نیشاندانی پشتیوانی بۆ ئەو هونەرمەندە، داوا لە كۆمەڵانی خەڵكی كوردستانیش دەکەین، بەهۆشیارییەوە مامەڵە لەگەڵ ئەو جۆرە وتار و بانگەشانەدا بكەن كە هونەر و هونەرمەندان دەكەنە ئامانج".

ئەگەر ئیسلام ئەوە بێت، ئەوە من نیم

لەچەند رۆژی رابردودا هونەرمەند ناسر ڕەزازی لە تۆمارێکی ڤیدیۆییدا وەڵامی مامۆستایەکی ئایینی دەداتەوە کە ڕەخنەی لێگرتوە و دەڵێت، "ئەگەر ئیسلام ئەوە بێت، ئەوە من نیم."  

بۆچی دژی ئەردۆغان ناوەستنەوە کە دژی کوردە

ناسر ڕەزازی لە تۆمارە ڤیدیۆکەدا ڕەخنەی توند لە بەشێک لە مامۆستا ئاینییەکان دەگرێت و دەڵێت، "بۆچی ناچن دژی سو خواردن بوەستنەوە، بۆچی دژی زەوازی موتعە ناوەستنەوە، بۆچی دژی ئەردۆغان ناوەستنەوە کە دژی کوردە."   

ئەو هونەرمەندە لە تۆڕە کۆمەڵایەتییەکان كەوتەبەر هێرش و رەخنەگرتن

دەشڵێت، "ئاینی ئیسلامیان وا لێکرد کوردی کرد بە کۆیلە، ئەگەر ئیسلام ئەوە بێت، ئەوە من نیم"، لەکاردانەوەی قسەکانیدا ئەو هونەرمەندە لە تۆڕە کۆمەڵایەتییەکان كەوتەبەر هێرش و رەخنەگرتن.

نیشانەکردن

کوردستان