هەواڵی ئەمڕۆ

قۆناغێکی دیکە ڤاکسینی ئاسترازینیکا دەگاتە کوردستان

09:37 - 05/04/2021

7499جار خوێندراوەتەوە

خەندان-

سەرەڕای بەرزبونەوەی ئامارەکانی توشبون و مردن بە پەتاکە، بەڵام وەزارەتی تەندروستی هەرێمی کوردستان دڵنیایی دەدات کە لەم مانگەدا قۆناغی دوەمی ڤاکسینی ئاسترازینیکا دەگاتە هەولێر و بۆ هاوڵاتیان بەکاردەهێنرێت، کە لەپاڵ خۆپارێزی هاوڵاتیان و جێبەجێکردنی رێنماییەکاندا، وەک سەرەکیترین رێکاری بەرەنگاربونەوەی ڤایرۆسی کۆرۆنا ناودەبرێت.

هەڵمەتی بەکارهێنانی ڤاکسینەکە لەبنکە تەندروستییەکانی تایبەت بە پێدانی ڤاکسین بەردەوامی هەیە
د.ئاسۆ حەوێزی، وتەبێژی وەزارەتی تەندروستی بە خەندان-ی راگەیاند، دوای ئەوەی لەقۆناغی یەکەمدا 43000 (چل و سێ هەزار) ژەمە ڤاکسینی ئاسترازینیکا-ئۆکسفۆرد گەیشتە هەرێمی کوردستان، لەئێستادا هەڵمەتی بەکارهێنانی ڤاکسینەکە لەبنکە تەندروستییەکانی تایبەت بە پێدانی ڤاکسین بەردەوامی هەیە.
 لەم مانگەدا قۆناغی دوەمی ڤاکسینی ئاسترازینیکا دەگاتە هەولێر
ئاماژی بەوەشکرد، گەیشتنی ڤاکسینەکە لەچوارچێوەی پڕۆژەی کۆڤاکس دایە و تائێستا رێژەی گەیشتنی دوەم قۆناغی ڤاکسینەکە لەلایەن وەزارەتی تەندروستی عێراقەوە دیارینەکراوە، بەڵام دڵنیاییان پێدراوە کە بەم زوانە و بەدیاریکراوی لەم مانگەدا قۆناغی دوەمی ڤاکسینی ئاسترازینیکا دەگاتە هەولێر.
بۆ هەڵسەنگاندنی ئامارەکان 10-12 رۆژ پێویستە و دواتر بڕیاری دیکەی پێویست دەدرێت
لەبارەی پرسی راگرتنی دەوام و داخستنی مزگەوتەکانیش، وتەبێژی وەزارەتی تەندروستی ئەوەی خستەڕو، لیژنەی باڵای روبەڕوبونەوەی کۆرۆنا بۆ هەڵسەنگاندنی ئامارەکانی تایبەت بە بڵاوبونەوەی کۆرۆنا پێویستی بە 10-12 رۆژ دەبێت و دوای تەواوبونەوەی ئەو ماوەیەش بڕیاری دیکەی پێویست دەدرێت.