ئیتاڵیا و تێپەڕبوونی 13 ساڵ بەسەر نازناوی مۆندیالی 2006

- 11-07-2019 - 2144 جار خوێندراوەتەوە

خەندان سپۆرت - هەژار دەرویژە

 

پێکهاتەیەکی یەکدەست و پتەو بەدرێسی ئاتزۆری و بەڕاهێنەرایەتی مارچێلۆ لیپی ئەزمووندار لەرێکەوتی 9ی تەموزی ساڵی 2006 مێژوویەکی تازەی بەناوی خۆی تۆمار کرد.

 ئەوان بەلێدانەکانی یەکلاکەرەوە و لەیاری فەیناڵدا سەرکەوتن بەسەر هەڵبژاردەی تۆکمە و بەهێزی فەڕەنسا و سەرکردەی کەڵەشێرەکان، زێنەدین زێدان.

 ئیتاڵیا بۆ چوارەم جار لەمێژوودا بووە پاڵەوانی گەورەترین تۆڕنۆمێنتی وەرزشی جیهان لەیاری تۆپی پێ. 

دوو رۆژ بەر لەئێستا 13 ساڵ تێپەڕی بەسەر ئەو ڕووداوە مێژووییە لەساڵی2006. ئەمڕۆکە هەر یەک لەیاریزانانی ئەو کاتەی لیستی 23 کەسی پێکهاتەی ئاتزۆریەکان، سەرقاڵن بەتێپەڕاندنی سەردەمێکی نوێ لەژیانی ئاسایی خۆیان تەنها جیان لویجی بوفۆن نەبێت کە تا ئەم ساتەش وەک یاریزان لەناو یاریگاکان ماوەتەوە و درێژە بەکاروانی وەرزشی خۆی دەدات. 

کەم تا زۆر هەموومان حەز بەوە دەکەین بزانین ئاخۆ یاریزانە ئەستێرەکانی ئەوسای هەڵبژاردەی ئیتاڵیا، ئێستا خەریکی چین و لەکوێن و ژیانیان چۆن تێپەڕ دەکەن؟! 

1.جیان لویجی بوفۆن تەمەن 41 ساڵ: وەک یاریزان و بۆ ئێستا ئەندامە لەیانەی یۆڤانتوس. وەرزی ڕابردووی وەک گۆڵپارێز لەریزی یانەی پی ئەس جی فەڕەنسی بەڕێکرد.

2. کریستین زاکاردۆ تەمەن 37ساڵ: دوو رۆژ بەر لەئێستا و لەریزی یانەی ترێفۆری سان مارینۆ بۆ هەمیشە ماڵئاوایی لەیاری تۆپی پێ کرد.
3. فابیۆ گرۆسۆ تەمەن 41 ساڵ: لەماوەکانی رابردوو وەک ڕاهێنەری یانەی هێلاس ڤێڕۆنا، لەئەرکەکەی دوور خرایەوە. 
4. دانیێلی دی ڕۆسی تەمەن 35 ساڵ: چەند ڕۆژێک بەر لەئێستا، دوای وازهێنان لەبەردەوامبوون و یاریکردن بەدرێسی یانەی ڕۆما رایگەیاند: بەم زووانە ماڵئاوایی لەیاری تۆپی پێ دەکات. 
5. فابیۆ کاناڤارۆ تەمەن 45 ساڵ: راهێنەری یانەی گوانگژۆ ئۆڤەرگراندە لەوڵاتی چین.
6. ئاندریا بارتزالی تەمەن 38 ساڵ: ئەگەری زۆرە وەک ڕاهێنەر لەدەستەی ڕاهێنەرانی تیپەکەی ساری واتە یانەی یۆڤانتوس دەست بەکار بێت. 
7.ئەلێساندرۆ دێل پێرۆ تەمەن 44 ساڵ: لەویلایەتە یەکگرتووەکانی ئەمریکا سەرقاڵی ژیانی ئاسایی خۆیەتی و وەک شیکەرەوەی یاری تۆپی پێ لەکاناڵە وەرزشیەکان بەشداری دەکات. 
8. گێنارۆ گاتوزۆ تەمەن 41 ساڵ: دوای ئەوەی ئەرکی ڕاهێنەرایەتی یانەی میلانی لێ سەندرایەوە، ئێستا بێکارە.
9. لۆکا تۆنی تەمەن 42 ساڵ: لەکاتی ئێستادا هیچ جۆرە چالاکیەکی لەیاری تۆپێ پێ دا نیە و ژیانی ئاسایی خۆی بەڕێ دەکات. 
10. فڕانچێسکۆ تۆتی تەمەن 42 ساڵ: دوای وازهێنانی لەدەستەی بەڕێوەبردنی یانەی ڕۆما، دیار نیە بۆ داهاتوو سەرقاڵی چی دەبێت.
11. ئەلبێرتۆ جیلاردینۆ تەمەن 37 ساڵ: لەسێریا سی وڵاتی ئیتاڵیا، ئەندامە لەدەستەی هونەری یانەی پێرۆ وێرچلی. 
12. ئانجێلۆ پیرۆتزی تەمەن 49 ساڵ: ئەندامە لەدەستەی بەڕێوەبردنی یانەی لاتزیۆ. 
13. ئەلێساندرۆ نێستا تەمەن 43 ساڵ: راهێنەری یانەی (فروزینۆنە)یە. 
14. مارکۆ ئامێلیا تەمەن 37 ساڵ: لەسێریا دی وڵاتی ئیتاڵیا ڕاهێنەرە لەیانەی واتسە. 
15. وینچێنزۆ یاکوینتا تەمەن 39 ساڵ: بە دوو ساڵ زیندانیکردن حوکم دراوە بەتاوانی قاچاخچیەتی بەچەک و چۆڵ. 
16. ماورۆ کامۆرانێزی تەمەن 42 ساڵ: لەکاناڵە وەرزشیەکانی تەلەفزیۆن وەک شارەزایەکی یاری تۆپی پێ چالاکی هەیە. 
17. سیمۆنێ بارۆنی تەمەن 41 ساڵ: راهێنەری تیپی لاوانی یانەی ساسولۆی وڵاتی ئیتاڵیایە.
18. فیلیپۆ ئینزاگی تەمەن 45 ساڵ: راهێنەری یانەی (بێنونتۆ)یە. 
19. جیان لۆکا زامبرۆتا تەمەن 42 ساڵ: راهێنەری پێشووی یانی جیانگسۆ سۆنینگ بوو و ئێستاش شرۆڤەکاری یاری تۆپی پێیە. 
20. سیمۆنێ پیڕۆتا تەمەن 41 ساڵ: یەکێکە لەئەندامە سەرەکیەکانی یەکیەتی تۆپی پێی وڵاتی ئیتاڵیا. 
21. ئەندریا پێرلۆ تەمەن 40 ساڵ: شارەزای یاری تۆپی پێ لەمیدیاکاندا.
22. ماسیمۆ ئۆدۆ تەمەن 43 ساڵ: راهێنەری یانەی (پێڕۆجا) یە لەوڵاتی ئیتاڵیا. 
23. مارکۆ ماتیراتزی تەمەن 45 ساڵ: شارەزای یاری تۆپی پێ لەمیدیاکاندا. 

لەکۆتاییشدا ڕاهێنەری ئیتاڵیا لەمۆندیالی 2006  مارچێلۆ لیپی تەمەن 71 ساڵ، ئێستاکە راهێنەری هەڵبژاردەی تۆپی پێی وڵاتی چینە.

 

 


ئەم وتارە دەربڕی رای نوسەر خۆیەتی و خەندان لێی بەرپرسیار نییە


Copyright © 2017 Xendan.org all rights reserved

designed and developed by AVESTA GROUP