کلاسیکۆ.. خێرەكەی بۆ ئەوان و شەڕەكەی بۆ ئێمە

- 20-12-2017 - 2002 جار خوێندراوەتەوە

كاروان مەسعود

 

نزیك دەبینەوە لە یاری نێوان بەرشلۆنە و ریاڵ مەدرید كە بە كلاسیكۆ ناسراوە، هەموو چاوەكان، قەڵەمەكان و رۆژنامە و سایتە ئەلیكترۆنیەكان دەچێتە سەر ئەو دوو یانەیە بەتایبەت لە وڵاتی ئیسپانیا و ئەوروپا و جیهان بە گشتی.

هەرێمی كوردستانیش بە دوورنیە لەو كەشە گەرم و گوڕەی پێش بەرێووەچوونی هەر یارییەكی كلاسیكۆ بە خۆیەوە دەیبینێت، لێرەش رۆژنامە و سایتەكان زیاتر فۆكس دەخەنە سەر هەواڵەكانی ئەو دوو یانەیە بە گشتی و هەردوو ركابەرەكەش مێسی و رۆناڵدۆ.

ئەوەی كلاسیكۆی ئەمجارە لەوانی دیكە جیادەكاتەوە، كاتی بەڕێوەچوونی یاریەكەیە لە كاتژمێر سێی پاشنیوەڕۆ بە كاتی هەرێم لەسەر یاریگای سانتیاگۆبێرنابیۆ ئەنجام دەدرێت،قسەكە لە سەر ئەوەیە كە ئەوان لە پێناو كۆمەلێك بەرژەوەندی كاتەكەیان دیاریكردووە، بەتایبەت هەردوو یانە لە ئێستا لە كیشوەری ئاسیا هاندەرێكی زۆریان هەیە، ئەمە جگە لەو گرێبەستانەی كە یانەكان لەگەڵ كۆمپانیاكانی ئاسیا ئەنجامیانداوە، ئەمانە هەمووی لەپێناو كۆكردنەوەی داهات و قازانجە.

 

پێشبینی دەكرێت كلاسیكۆ 650 ملیۆن بینەری هەبێت، بێگومان بەشێكی زۆری لە ئاسیایە بەتایبەت وڵاتانی چین و ژاپۆن و هیندستان و ئیندۆنوسیا كە ئەوان ژمارەی دانیشتوانەكانیان زۆرە،پێشبینی دەكرێت داهاتێكی زۆر بەم بۆنەیەوە دەست هەریەكە لە بەرشلۆنە و ریاڵ مەدرید و سپۆنسەرانی یاریەكە بكەوێت بە تایبەت رابیتەی یانە پیشەگەرەكانی ئیسپانیا، جگە لە راكێشانی گەشتیار و كۆمپانیای زیاتر بۆ ئەم نێوەندە، كەواتە خێرەكەی بۆ ئەوانە.

لەم هەرێمەی خۆشمان هەر كاتێك یاریی كلاسیكۆ دەبێت، بە دەگمەن گوێت لەوە نابێت كە رووداوێكی نەخوازراو یان گرژی و ئاڵۆزی لەنێوان هاندەرانی هەردوو جەمسەرەكەی ئیسپانیا روونەدات ،هێندە دەروونمان هیلاكە ناتوانین شكست قبوڵ بكەین، پێمانوایە هەر دەبێت براوەبین و ناكرێت نەدڕۆێین... ئەگەر دۆڕانین دەبێت گرژی دروست بكەین، ئومێد دەكەم هاندەرانی وەرزشی كوردی لە گۆشەی فراوانتر و زیاترەوە لێكدانەوە بۆ یارییەكان بكەین بەتایبەت كلاسیكۆ، بۆخۆم چەندجار لە كاتی رووماڵی یارییەكانی كلاسیكۆ ئەم حاڵەتانەم بینیوە بە جۆرێك گرژییەكان گەورە بووە بەهێزە ئەمنیەكان كۆنترۆڵ كراوە، كەواتە شەڕەكەی بۆ ئێمەیە.


ئەم وتارە دەربڕی رای نوسەر خۆیەتی و خەندان لێی بەرپرسیار نییە


Copyright © 2017 Xendan.org all rights reserved

designed and developed by AVESTA GROUP