نێیمار وەک قوربانی

- 26-08-2017 - 5002 جار خوێندراوەتەوە

هۆگر حەمەساڵح

دەربارەی تۆپی پێ و سیاسەت
زۆر دوور ناڕۆین، پێكەوە تەماشایەكی چەند حاڵەتێكی ئەم هاوینە دەكەین: نیمار و میسی

هەندێك كڵێشەی باو لەبارەی پەیوەندیی وەرزش بە سیاسەتەوە هەن، هاندەرە لەخۆباییەكان و رۆشنبیرە لیبڕاڵەكان زۆر بە لوتبەرزییەوە دوبارەی دەكەنەوە، ئەم دوبارەكردنەوەیە زۆرجار لەنائاگاییەوە سەرچاوەدەگرێت.

رۆشنبیرەكان كڵێشەیەكیان هەیە و زۆرجار لە كاتی كلاسیكۆ یان مۆندیالدا دەری دەبڕن و فەیسبوكی پێ پڕدەكەنەوە، وەك ئەوەی دەڵێن: با كەمێك لە سیاسەت دوربكەوینەوە و تەماشایەكی كلاسیكۆ بكەین!.. با چوار ساڵ جارێك دەرفەتی ئەوەمان هەبێ پێكەوە بژین و لەسیاسەت دوربكەوینەوە و چێژ لەمۆندیال وەربگرین.

هاندەرە لەخۆباییەكانیش (ئەوانەی ماوەیەكی درێژترە تەماشای تۆپی پێ دەكەن، یان لە میدیای وەرزشی كاردەكەن) دەڵێن: پێویستە رێگە لەهاتنەناوەوەی سیاسەت بۆ ناو وەرزش بگرین.. وەرزش هەموو دەنگ و رەنگە جیاوازەكان لەدەوری خۆی كۆدەكاتەوە.. تۆپی پێ ناكۆكییە سیاسییەكان ناخوێنێتەوە و وەرزشێكە كە دەتوانێت تۆوی ئاشتی بچێنێت.
باشە چۆن لە سیاسەت دوردەكەویتەوە، ئەی ئەم تۆوی ئاشتییەی بەدەستی تۆپی پێ دەچێنرێت دەبێ چی ئاشتییەك بێ؟ 

ئایا هەر بەراست وەرزش (دیوی سیاسەت)ی هەیە؟ یان كۆی پرۆسەكە سیاسەت و بازرگانییە و (دیوێكی وەرزشی)ی هەیە؟ راستییەكەی شتێك نییە بەناوی "دیوی سیاسەت لەنێو وەرزشدا"، ناتوانین بڵێین سیاسەت لە كونجێكەوە خۆی خزاندۆتە نێو فەزای تۆپی پێوە.. نەخێر دۆخەكە تەواو پێچەوانەوەیە: فەزایەكی فراوانی سیاسەت و بازرگانیمان هەیە، لە كونجێكیشەوە وەرزش و تۆپی پێ نمایشی تێدادەكەن، ئەمەش بەتەواوی بەرهەمی سەرمایەدارییە.

"دیوە وەرزشییەكەی" نێو ئەو فەزا سیاسی و بازرگانییە خۆی لەو 90 خولەكەدا دەبینێتەوە، كە تیایدا بەدیار تەماشاكردنی یارییەكەوە دادەنیشیت (زۆرجار ئەو 90 خولەكەش بێلایەن نییە، بە سیاسەت و بازرگانی بارگاوی دەبێتەوە، چونكە مەسەلەكە لەبنەڕەتەوە سیاسەت و بازرگانییە).

زۆر دوور ناڕۆین، پێكەوە تەماشایەكی چەند حاڵەتێكی ئەم هاوینە دەكەین (هاوین لە فەرهەنگی تۆپی پێدا چیتر بەمانای بەرزبونەوەی پلەكانی گەرما و دەورانی وەرزەكانی ساڵ نایەت، بەڵكو مانایەكی تەواو ئابورییانەی وەرگرتووە و بە بازاڕی هاوینە ناودەبرێت، دەتوانین لەدەرفەتێكی دیكەدا بێینەوە سەری و ئاماژە بە "هێزی هاوین" بكەین لە ئاڕاستەكردنی تۆپی پێ و هاندەراندا).

گواستنەوەی نیمار لە بەرشەلۆنەوە بۆ ژێر هەیمەنەی قەتەرییەكان و هەوڵی ئیماراتییەكان بۆ كڕینی میسی، نمونەی زەق و دیارن بۆ سەلماندنی ئەوەی "وەرزش دیوێكی بچوكی نێو فەزایەكی گەورەی سیاسی و بازرگانییە".

كەس پرسیاری كرد نیمار بۆچی بەو شێوە چاوەڕواننەكراوە بەرشەلۆنەی جێهێشت؟ ئاخر نیمار پرۆژەی بەرشەلۆنە بوو، لەهەمانكاتدا بەرشەلۆنەش بۆ نیمار پرۆژە بوو، كەچی بە پرتاو كوڕە بەرازیلییەكە خۆی لە باخچەكانی پاریسدا بینییەوە و بوو بە پرۆژەی قەتەرییەكان!

ئەگەر ناكۆكیی سیاسی لە نێوان قەتەر و چوار وڵاتە عەرەبییەكەدا دروست نەبوایە، هەرگیز بیرت لەوەدەكردەوە نیمار درێسی پاریس سان جێرمان بپۆشێت؟
ئەگەر قەتەر نەیویستایە هەژمونی سیاسی و ئابورییانەی خۆی نیشان بداتەوە، هەرگیز بیرت لەوەدەكردەوە ئێم ئێس ئێنەكەی بەرشەلۆنە كەلێنی تێ بكەوتایە؟
قەتەرییەكان، كە خاوەندارێتیی رەهای یانە پاریسییەكە دەكەن، چەند ئامانجێكیان هەبوو لەوەی نرخی هەڵوەشاندنەوەی گرێبەستەكەی نیمار بدەن، ئەوان لەلایەك دەیانویست رووی وڵاتەكەیان سپی بكەنەوە و هێزی ئابووریی خۆیان نمایش بكەنەوە و بە نەیارەكانیان بڵێن "گەمارۆكانی ئێوە كارمان تێ ناكەن". لەلایەكی تریشەوە، بۆ رێگەیەك دەگەڕان تۆڵە لە بەرشەلۆنە بكەنەوە، بەوپێیەی یانە ئیسپانییەكە كۆتایی بە سپۆنسەریی كۆمپانیای فڕۆكەوانیی قەتەر هێنا و گرێبەستی لەگەڵ كۆمپانیایەكی دیكەدا ئیمزاكرد.

تەماشا بكە سیاسەتی باڵادەست و بازرگانی چۆن تێكەڵ دەبن!
بەڵگەی زەق بۆ سەلماندنی ئەم ئارگیۆمێنتە، كاردانەوەی بەرپرسانی یانەی مانچستەر سیتیی ئینگلیزی بوو، ئەو یانەیەی لەلایەن شێخ مەنسورەوە سەرۆكایەتی دەكرێت. ئەو شێخەی كە ملیاردێرێكی ئیماراتییە و لەئێستادا نەیاری سەرسەختی قەتەرییەكانن.

هەر لە دوای گواستنەوەی نیمار بەرامبەر 222 ملیۆن یۆرۆ، شێخ مەنسور ئامادەیی خۆی نیشاندا نرخی هەڵوەشاندنەوەی گرێبەستەكەی میسی بدات، كە بڕەكەی 300 ملیۆن یۆرۆیە. ئەمەش وەك تەحەدایەك لەبەرامبەر قەتەرییەكاندا.

كەواتە لێرەدا قوربانییەكە "نیمار" بوو. ئەو بووە قوربانیی پرۆژەیەكی سیاسیی سەرمایەدارانە.. تۆش چەپڵە بۆ پاریس لێ بدە و بۆ بەرشەلۆنەش بگری!


ئەم وتارە دەربڕی رای نوسەر خۆیەتی و خەندان لێی بەرپرسیار نییە


Copyright © 2017 Xendan.org all rights reserved

designed and developed by AVESTA GROUP