پێش نەیمار چووم بۆ پاریس!

- 10-08-2017 - 4244 جار خوێندراوەتەوە

زاگرۆس نانەكەلی

 

ئەم نووسینەم بەروارد نییە لەنێوان من و نەیمار، من میدیاكارێكی وەرزشیم لە كوردستان و نەیماریش وەرزشكارێكی نێودەوڵەتییە، ئەوەی مەبەستمە ئێستای سەرلێشێواوی میدیای وەرزشی كوردییە، هۆكارەكەشی روونە كە بە میزاج وناپڕۆفیشناڵی كارەكان مەیسەر دەكەن وەكو ئەوەی بڵێی بە ملیان داهاتووە و دەبێت بەخۆشی بێت وبە ترشی بێت بیكەین.

 

من پێش نەیمار چووم بۆ پاریس!، لەكۆتایی نەیماریش چوو بۆ پاریس، من میدیاكارێكی وەرزشی كوردی و نەیماری یاریزانێكی بەرازیلی كە چەقی كێشەكەمان پاریسە،بەڵام دوو ئاراستەی جیاواز، میدیاكار و وەرزشكار.

 

بەڕاستی ئەو ماوەیەی هەواڵی نەیمار لەلای میدیاكارانی وەرزشی كوردستان بەڕادەیەك گرنگی پێدرا هەروەكو كورد دەڵێ (كوچك لە ئاگری گەرم ترە)،ئەمەش بەهۆی چەند هۆكارێكی سادەبوو، ئەو ماوەیە هیچ چالاكی وەرزشی و خولەكانی جیهان لەئارادا نەبووبێت،پاشان ركابەریی هەواداران و هاندەران و میدیاكارانی یانەكان كە هەندێك پێیان ناخۆش بوو هەندێكیش بەپێچەوانەوە پێی دڵخۆش بوون كە نەیمار چووەتە یانە پاریسییەكە، هەندێك هەواڵەكەی بەو مەبەستە دادەبەزاند گوایە ئاگاداری گۆڕانكاریی و پێشهات و رووداوە خێرا و بە پەلەكانی جیهانە، هەندێك بە رۆشنبیری گشتی دەزانی، بەشێك شەڕی ساردی لەگەڵ هاوڕێكانی پێ ئەنجام دەدا،هەندێكیش لەدابەزاندن و بڵاوكردنەوەی  هەواڵەكەدا دڵگرانی خۆی نیشاندەدا!، ژمارەیەك هێندە بەگرنگی وەرگرتبوو ئینتیما و مینتیمای نیشتیمانی لەبیر چووبووەوە!،هاوكێشەكەش ئەوەبوو یاریزانێكی بەرازیلی لەئیسپانیاوە چووەتە فەرەنسا، بەڵام لەكوردستان هەروەكو جاران بووبوون بەدوو بەرە، لای هەندێك ئاهەنگ و هەندێكی تریش ماتەم!.
*سەرەنجام/ لەنێوان چوونی من و نەیمار بۆ پاریس ئەم جیاوازییانە هەبوون:

 

-نەیمار یاریزانی بەرازیلییە.

 

-زاگرۆس میدیاكارێكی وەرزشی كوردییە.

 

-زاگرۆس رۆژی 4-7-2017 چووم بۆ پاریس.

 

-نەیمار رۆژی 4-8-2017 چوو بۆ پاریس.

 

-نەیمار  بۆ پێنج وەرز مانەوە لەیانەكەی پاریس، بڕی 222 ملیۆن دۆلاری وەرگرت.

 

-زاگرۆس بۆ پێنج رۆژ مانەوە لەشاری پاریس 22 گەڵای خەرجكرد.

 

-نەیمار بە فڕۆكەیەكی تایبەت گەشتی پاریسی كرد.

 

-فڕۆكەكەی ئێمەش دەتگوت بە دارلاستیك لێیان داوە، تۆزێكی مابوو بكەویتە ناو دەریا!

 

-نەیمار بۆ تۆپی زێڕین و نمایشە جادووییەكانی خۆی چووە پاریس.

 

-منیش بۆ سیمینارێكی میدیای وەرزشی تا وڵاتەكەم زیاتر بناسێنم.

 

-نەیمار پاریس لەپێشوازی خۆی و خانەوادەكەی دابوو.

 

-منیش بۆ ناسینی میدیای وەرزشی كوردی چووم لە كوردستان (300) دۆلار كرێی نیوەی كتێبەكانیان لێ وەرگرتم، ئەگەر هەموو كتێبەكانم ببردبوایە، دەبوو (714) دۆلار بدەم بێگومان لە گیرفانی خۆم!.

 

-نەیمار لە كوردستان زیاتر 50 دەزگای راگەیاندنی وەرزشی و ناوەرزشی لە خزمەتی دابوون و هەموویانی بەخۆی سەرقاڵ كردبوو.

 

-منیش لەوانەیە (5) دەزگا بەخێری خۆیان هەواڵەكەیان بڵاوكردمەوە.!

 

-نەیمار چووە پاریس ئیسراحەتی كرد و سەرمان سووك بوو.

 

-كێ ناڵێ ئێستا پڕوپاگەندەیان ئەوەشیان نەكردووە كەچوونی نەیمار بۆ پاریس لەبن سەری زاگرۆس نانەكەلییە!.

 

ئەمەش چیرۆكی راستەقینەی زاگرۆس و نەیمار بوو بۆ پاریس، خوایە وەتەن ئاواكەی چەند دڵگیر و شیرینە!.


ئەم وتارە دەربڕی رای نوسەر خۆیەتی و خەندان لێی بەرپرسیار نییە


Copyright © 2017 Xendan.org all rights reserved

designed and developed by AVESTA GROUP