كۆتایی چامپیۆنس لیگ... بەدەستنوسی زێدان

- 31-05-2017 - 3673 جار خوێندراوەتەوە

بەهمەن غەریب 

 

هەمیشە یاریی كۆتایی پاڵەوانێتیەكان گرنگی گەورەی هەبوە‌و بینەر‌و هاندەر بەپەرۆشەوە چاوەڕێی ئەو رووداوە مەزنەبوون جا لە هەر خول‌و پاڵەوانێتیەكدا بێت، بەڵام یاریی كۆتایی چامپیۆنس لیگ یەكێكە لەگەورەترین كەرنەڤاڵەكانی تۆپی پێی ئەوروپا‌و تەنانەت پێش پاڵەوانێتیەكانی فیفاشی داوەتەوە، چونكە لەیانەیەك‌و لە پێكهاتەیەكی 11 یاریزانیدا زۆرترین ئەستێرە لەخۆی كۆدەكاتەوە.

یاریی كۆتایی ئەم وەرزەی چامپیۆنس لیگ كە لەنێوان ریاڵ مەدرید‌و یۆڤانتۆس لەسەر شانۆی كاردیڤی وڵاتی وێڵز بەڕێوەدەچێت، بەتامترین یاریی دەبێت لەكۆی ئەو یارییانەی كە لەقۆناغی كۆمەڵەكان‌و قۆناغی 16‌و تەنانەت ریمۆنتاداكەی بەرشەلۆنەش بەسەر پاریس سان جێرمان، چونكە هەردوو یانە لەوپەڕی ئاستبەرزیدان‌و ماوەیەكی زۆرە كۆتاییەكی لەو شێوەیە ئەنجامنەدراوە.

ریاڵ مەدرید بەباشترین كاتەكانیدا تێپەڕ دەبێت، چونكە لەئیسپانیا پادشای لالیگایە‌و نازناوەكەی لەدەستی بەرشەلۆنە رفاند، ئەوەش باشترین پاڵنەربووە بۆ ئەوەی یاریزانەكان بخاتە ترۆپكی بەهێزیی باری دەرونیەوە، كە ئەمەی كۆتاییان یەكێكە لەرەگەزە سەرەكییەكانی زانستی راهێنان بۆ ئەوەی باشترین ئەنجام تۆمار بكەیت‌و وادەكات زیدان‌و یاریزانەكانی لە وێڵز بەباشترین شێوە دەربكەون.

یانەی شاهانە جگە لەوەی لەم وەرزەدا خۆی وەك تیپێكی بەهێز دەركەوتوە‌و بەسەركردایەتی زیدان ئەو رێچكەیەی شكاند كە پشت بەتاكە یاریزانێك ببەستێت، هەرچەندە كریستیانۆ رۆناڵدۆ گەورەترین چەكی راهێنەرە فەرەنسیەكە دەبێت بۆ ئەوەی ببێتە خاڵی جیاوازی‌و نازناوەكە بۆ شەقامەكانی مەدریدی پایتەخت بگوێزنەوە، بەڵام مۆدریچ‌و كروس‌و ڤاسكوێز‌و بنزیما‌و تەنانەت مارسیلۆش خاڵی جیاوازی دەبن.

ئەگەر لەرابردودا هەندێك رۆژنامە‌و هاندەر (كە زۆربەیان دژی ئەو ئەستێرەیەن) رەخنەیان لەرۆناڵدۆ گرتبێت بەوەی پیاوی یارییە گەورەكان نیە، بەڵام بۆ ئێستا هەڵەیەكی مێژووییە ئەگەر قەرەی ئەو زارەوەیەش بكەوین، چونكە رۆناڵدۆ لەم وەرزەدا سەلماندی كە بەتەنیا خۆی دەتوانێت شۆفێری شەمەندۆفێرێكی گەورەی وەك یانەی شاهانە بكات، باشترین‌و ساناتیرن بەڵگەش پێنج گۆڵەكەی بوو كە بە دوو یاریی لە مانوێل نوێری تۆماركرد، بۆیە ئەو ئەستێرە پرتوگالیە لەیاریی كۆتاییدا دوو ئەركی قورسی هەیە، یەكەمیان سەرخستنی یانەی ریاڵ مەدریدە بۆ ئەوەی بیكاتە یەكەم یانەی كیشوەری ئەوروپا كە دوو جار لەسەریەك ببێتە پاڵەوانی چامپیۆنس لیگ، دوەمیان بۆ گیرفانی خۆیەتی‌و لەكاتی بردنەوە لە یوڤی، ئەوا تارادەیەكی زۆر تۆپی ئاڵتونی پێنجەم مسۆگەر دەكات.

یەكێكیتر لەتایبەتمەندیەكانی ریاڵ مەدرید، زیدانی راهێنەرە، ئەو راهێنەرە گەورەترین شۆڕشی لەیانەی شاهانە بەرپاكرد، كە گەورەترینیان دورخستنەوەی دەستی پێرێزی سەرۆك بوو لە ژوری جلگۆڕین‌و پێكهاتەی تیپەكە، لەهەمان كاتدا زیدان وانەیەكی باشی فێری ئەستێرەكانی ریاڵ مەدرید كرد بەوەی ئەو وەرزشەی ئەوان دەیكەن تێنس‌و یاریی راكردن‌و هەڵدانەكانی گۆڕەپان‌و مەیدان نیە، بەڵكو یارییەكی بەكۆمەڵە‌و دەبێت بە 11 یاریزانەوە یاری بكەن، لەم وەرزەشدا بینیمان چەندین جار بەپێكهاتەی دوەمەوە یاریدەكرد‌و تەنانەت رۆناڵدۆش لەسەر كورسی‌و یەدەگ یان لەناوەڕاستی یاریەكەدا گۆڕانكاری پێدەكرا، بۆیە زیدان لەیاریی كۆتایدا بەرامبەر یوڤی وەك تیپ دەجەنگێت‌و پشت بە تاكە یاریزان نابەستێت.

ئەگەر فلۆرەنتینۆ پێرێزی سەرۆكی یانەی ریاڵ مەدرید لەرابردوودا بە پیاوە بازرگانەكە ناوی دەركردبێت، بۆ ئێستا باشترین بازرگانە لەیاریگادا‌و كارەكەی زیدانی تەواوكردوە بەوەی یاریزانە یەدەگەكانی هاوشێوەی یاریزانە سەرەكیەكانی ئاستیان بەرزە، كەواتە پارەكانی پێرێز بەهەدەر نەرۆیشتوە‌و شایستەی ئەوەیە ببێتە پاڵەوانی ئەوروپا.

تیپی یانەی ریاڵ مەدرید (بۆیە دەڵێم تیپ چونكە ئەو یانەیە لەم وەرزەدا بەراستی وەك تیپ دەركەوتوە وەك چۆن لەیاریی پۆستەدا یەك یاریزان هەڵە بكات تیپەكە زیانی پێدەگات، ریاڵ نەیهێشتووە یەك یاریزان لە لێپرسراوی دوربكەوێتەوە، ئەو یانەیە گەورەترین توانای هەیە لە تێكشكاندانی هێڵە جیاوازەكانی تیپی بەرامبەر، هەرچەندە ركابەرەكەی ئەمجارەی زۆر توندە‌و خاوەنی هێڵێكی پتەوی بەرگریە، بەڵام چەكەكان‌و شێوازی یاریكردنی ریاڵ مەدرید پێمان دەڵێن كە توانای هەیە بگاتە گۆڵەكەی بوفۆن، ئەویش لەڕێگەی سەركەوتنی مارسیلۆ‌و لێدانە بەهێزەكان لەدەرەوەی ناوچەی سزا‌و لێدان وەستاوەكان‌و لێدانە سەرەكان.

لەكۆتایدا‌و بەپشت بەستن بەو خاڵانەی سەرەوە دەكرێت ئاماژە بۆ ئەوە بكرێت كە ریاڵ مەدرید وەك تیپێكی تۆكمە دەركەوتوە‌و شایستەی ئەوەبوو كە لایەنێكی كۆتایی چامپیۆنس لیگ بێت، چونكە لەرابردودا‌و بەتایبەتی لەوەرزی رابردوودا ریاڵ مەدرید بەتیپە بەبەختەكە ناودەبرا بەوەی كەمترین یاریی قورسی دەكرد تا دەگەیشتە یاریی كۆتایی، بەڵام ئەم وەرزە جگە لەقۆناغی كۆمەڵەكان، روبەڕوی ناپۆلی‌و بایرن میونخ‌و ئەتلەتیكۆ مەدرید بوەوە‌و ئەو تیپانەی كردە دەرەوەی پاڵەوانێتیەكە.


ئەم وتارە دەربڕی رای نوسەر خۆیەتی و خەندان لێی بەرپرسیار نییە


Copyright © 2017 Xendan.org all rights reserved

designed and developed by AVESTA GROUP