به‌رشلۆنه‌ چۆن کلاسیکۆی برده‌وه‌؟

- 25-04-2017 - 3875 جار خوێندراوەتەوە

هه‌میشه‌ ئه‌وه‌ی یانه‌ی به‌رشه‌لۆنه‌ی وه‌کو پاڵه‌وان هێشتۆته‌وه‌ قورسایی هێڵی ناوه‌ڕاستی یانه‌که‌بووه‌، هه‌رچه‌نده‌ به‌م دواییه‌ باردۆخه‌که‌ گۆڕاوه‌، به‌ڵام هاتنه‌ دواوه‌ی میسی بۆ ناوه‌ڕاستی یاریگا، وایکردووه‌ هاوسه‌نگی یاریی بۆ تیپه‌که‌ بگه‌ڕێته‌وه‌. بۆ نموونه‌: له‌ یاریی کلاسیکۆ به‌ هاتنه‌ ناوه‌وه‌ی میسی بۆ چه‌قی مه‌یدان ستراتیجی یاریکردنی زێدان و هه‌ردوو یاریزان کاسیمیرۆ و مۆدریجی تێکدا.


 پێشم وایه‌ ئه‌وه‌ یه‌کێکبوو له‌و هۆکارانه‌ی تیپی بلوگرانه‌ لایه‌نی ده‌رونیان وه‌کو پاڵه‌وانی کلاسیکۆ بپارێزن، به‌ تایبه‌تی کاتێک میسی گۆڵی یه‌که‌می به‌ده‌ست هێنا، هێزی ته‌رکیز و متمانه‌ی به‌رشه‌ییه‌کان زیادیکرد، که‌ توانیان  وه‌کو براوه‌ی یارییه‌که‌ و پاڵه‌وانی لالیگا ده‌ربچن.

 دوای یارییه‌که‌ی یانه‌ی پاریسانجێرمان، سیرجۆ بۆسکێتس چاکترین ئاستی نمایشکرد، کاتێک هه‌موو جوڵه‌کانی به‌ زیره‌کی و ورد بۆ له‌ ناوبردنی تۆپه‌کانی تیپی ڕیاڵ مه‌درید بوو، به‌ڵام هۆکاری سه‌ره‌کی پاڵپشتیکردنی هه‌ردوو یاریزان ئینێستا و ڕاکیتچ بوو، که‌ به‌ به‌رده‌وامی کۆمه‌کی گه‌مارۆکانی سه‌ر ئه‌و یاریزانه‌یان که‌مده‌کرده‌وه‌، که‌ هه‌وڵی ئه‌وه‌یانده‌دا به‌ وه‌رگرتنه‌وه‌ی تۆپه‌کان هه‌ڵه‌ ته‌کتیکییه‌کانی ئه‌و یاریزانه‌ دووربخه‌نه‌وه‌، هه‌روه‌ها هه‌ردوو یاریزان ئینێستا و ڕاکیتیچ، سوودی زۆریان له‌ جوڵه‌کانی میسی وه‌رده‌گرت، که‌ده‌یتوانی له‌ نێوان هه‌ردوو هێڵی به‌رگری ڕیاڵ و به‌رده‌مه‌کان گوشاری تووند بخاته‌ سه‌ر کاسیمیرۆ و مۆدریج، یاخود هیچ ده‌رفه‌تێکی بۆ نه‌هێشتبوونه‌، تا له‌ ناوه‌ڕاستی یاریگادا بینای هێرش بۆ تیپه‌که‌یان دروست بکه‌ن، هه‌روه‌ها ئه‌مانه‌ ڕووبه‌رێکی زۆری یاریکردنی بۆ دووانه‌ی به‌رشه‌لۆنه‌ ده‌کرده‌وه‌، که‌ به‌ به‌رده‌وامی له‌ هه‌وڵی ئه‌وه‌دابوون تۆپه‌کان بخه‌نه‌ سه‌ری نووک و بیگه‌یه‌ننه‌ سوارێز. 


سوارێز گۆڵی نه‌کرد، به‌ڵام توانی لێهاتووانه‌ هه‌ردوو یاریزان ڕامۆس و ناچۆ، له‌گه‌ڵ ناڤاس ناچار بکات، زۆربه‌ی کات له‌ ناوچه‌ی هێڵی یاریکردنی خۆیان بمێننه‌وه‌، ئه‌وه‌ش وایکردبوو یارمه‌تی و کۆمه‌کی پشته‌وه‌ی یاریزانه‌کانی ڕیاڵ ته‌واو لاوازببَت. یاریی نه‌کردنی (نیمار) به‌ ته‌واوی ستراتیجی یاریی ئینریکی تێکدابوو، چونکه‌ چه‌پی یاریگا بۆ یانه‌ی به‌رشه‌لۆنه‌ مایه‌ی هیوا نه‌بوو، بۆیه‌ ئینریکی له‌کاتی هێرشکردندا پلانه‌که‌ی ده‌بووه‌ (4،3،2،1) به‌ ته‌نیا سوارێز له‌ پێشه‌وه‌ ده‌مایه‌وه‌(باکۆ)ـیش زیاتر ده‌بوو سه‌رقاڵی ناچۆ و کارڤاڵ بێت، به‌ بۆچوونی من: باشترین پلانی ڕاگرتنی یاریی تیپی دژبوو، ئه‌و بیرکردنه‌وه‌یه‌.

ڕێگای ده‌رچوون و گه‌مارۆدان و ده‌ستخستنی تۆپه‌کان ته‌نیا ناوه‌ڕاستی مه‌یدان بوو، له‌وێدا کلیلی نهێنی یارییه‌که‌ میسی بوو، که‌ به‌ به‌رده‌وامی به‌شداری ده‌کرد له‌ نیوه‌ی بینای هێرشه‌کانی تیپه‌که‌یدا، ئه‌وه‌ش به‌ڕاده‌یه‌کبوو که‌ هه‌رگیز (میسی)ـمان به‌و جۆره‌ نه‌بینیبوو، ئاوا له‌ یاریگادا تووند بۆ تۆپ یاریی بکات و ده‌ستی بخات، ئه‌وه‌ی له‌ به‌رامبه‌ر لیۆ وه‌ستایه‌وه‌ (تیرشتیگن)بوو، به‌ مانای وشه‌ هه‌موو هێرشه‌کانی ڕیاڵ مه‌دریدی په‌کخستبوو، به‌ تایبه‌تی دوو هێرشی ترسناکی  ڕۆناڵدۆ و هاوڕێکانی دوورخسته‌وه‌، دیاره‌ زۆرکات بنزیما ده‌بووه‌ سه‌رئێشه‌ بۆ به‌رگری به‌رشه‌لۆنه‌، هه‌ندێکجار هۆکاره‌که‌ی خراپی مامه‌ڵه‌ی تۆپه‌ زه‌مینییه‌کانبوو له‌لایه‌ن پیکییه‌وه‌، به‌ڵام به‌ مانای وشه‌ به‌رشه‌لۆنه‌ جیاوازبوو، جیاوازیه‌ک که‌ ته‌نیا میسی هاوڕێکانی ده‌توانن له‌ تۆپی پێدا ئه‌نجامی بده‌ن.


ئەم وتارە دەربڕی رای نوسەر خۆیەتی و خەندان لێی بەرپرسیار نییە


Copyright © 2017 Xendan.org all rights reserved

designed and developed by AVESTA GROUP