موشەكەكانی كۆریای باكور ئاراستەی سێ راهێنەری پریمەرلیگ دەكرێت

9/12/2017 5:10:00 PM 35648 جار خوێندراوەتەوە

خەندان سپۆرت – 

سیاسەتمەدارێكی ئیتاڵی نهێنییەكی كیم جۆنگ ئونی سەرۆكی كۆریای باكوری لەسەر یانەی مانچستەر یونایتد ئاشكرا كردووە.

رۆژنامەی زەسەنی بەریتانی لەزاری ئەنتۆنیۆ رازی سیاسەتمەداری ئیتاڵی بڵاویكردووەتەوە كە كیم جۆنگ ئونی سەرۆكی كۆریای باكور هاندەرێكی سەرسەختی یانەی مانچستەر یونایتدی ئینگلیزییە.

رازی وتوشیەتی "كیم خۆی بە مەزنترین هاندەری مانچستەر یونایتد دەزانێت، یارییەكانی ئەو یانەیەش لەتەلەفزیۆنی حكومی كۆریای باكور پەخش دەكرێت".

راشیگەیاندووە جەنەراڵەكەی كۆریای باكور سەرجەم یارییەكانی مانچستەر یونایتد و پاڵەوانێتیە گەورەكان سەیر دەكات، ئەو كاتەش كە لەسویسرا قوتابی بووە پەیوەندییەكی باشی لەگەڵ تۆپی پێ-دا هەبووە.

یارییەكانی مانچستەر یونایتد لەتەلەفزیۆنی حكومەتی كۆریای باكور بەشێوەی راستەوخۆ پەخش ناكرێت، سەرجەم ئەو گرتانەی لێ لادەبرێت كە ریكلام بۆ بەرهەمە بیانییەكان دەكات، بەو پێیەی ریكلام بۆ بەرهەمە بیانییەكە دژی یاساكانی دەوڵەتە.

رۆژنامەی زەسەنی بەریتانی وێنەیەكی سەرۆكی كۆریای باكوری بڵاوكردووەتەوە كە درێسی مانچستەر یونایتدی لەبەردایەو موشەكە ئەتۆمییەكانی ئاراستەی سێ راهێنەری پریمەرلیگ كراوە، ئەوانیش ئارسن ڤینگەری راهێنەری ئارسناڵ و ئەنتۆنیۆ كۆنتی راهێنەری چێڵسی و  پیپ گواردیۆلای راهێنەری مانچستەر سیتیە، ئەوەش لەكاتێكدایە سەرۆكی كۆریای باكور ئەو سێ یانەیە بەركابەری یانەی مانچستەر یونایتد دەزانێت.

 

es-kim-man-u-composite-inset01



Copyright © 2017 Xendan.org all rights reserved

designed and developed by AVESTA GROUP