ریاڵ مەدرید 75 ملیۆن یۆرۆی بۆ جێگرەوەكەی رامۆس تەرخانكردوە

11/20/2019 4:39:00 PM 11653 جار خوێندراوەتەوە

خەندان سپۆرت

 

یانەی ریال مەدریدی ئیسپانی لە پێناو ئەوەی جێگرەوەیەكی بەهێز بۆ سێرجیۆ رامۆسی كاپتن و بەرگریكاری یانەكەی بگوازێتەوە، بڕی 75 ملیۆن یۆرۆیان تەرخان كردوە بۆ ئەنجامدانی گرێبەستێكی نوێ.

بەهۆی ئەوەی سێرجیۆ رامۆس لە سەرەتای وەرزی رابردو كێشەی لەگەڵ سەرۆكی یانەكەی بوەو هەروەها تەمەنیشی بەرەو هەڵكشان چوە، بەرپرسانی یانەكە دەیانەوێت یاریزانێكی نوێ بۆ جێگەی ئەو بەرگریكارە بگوازنەوە، لە لایەكی دیكەوە ئەو یاریزانە داوای نوێكردنەوەی گرێبەستەكەی دەكات بە موچەی ساڵانەی 16 ملیۆن یۆرۆ، كە بەشێك لە بەرپرسانی یانەكە ڕازی نین بە داواكاری ئەو یاریزانە و پێیان باشە گرێبەستەكەی نوێ نەكەنەوە.

كەناڵی گۆڵ كە تەلەفیزیۆنێكی ئیسپانیە ئاشكرایكردوە، كە فلۆرەنتینۆ پیرێزی سەرۆكی یانەی ریاڵ مەدریدی ئیسپانی دەیەوێت خالیدۆ كۆلیبالی بەرگریكاری یانەی ناپۆلی ئیتاڵی بەرەو ریزەكانی یانەكەی بگوازێتەوە، كە ئەم بەرگریكارە لە لایەن یانەكانی جیهانەوە خواستی زۆری لەسەرە.

هەمان سەرچاوە ئەوەشی ئاشكراكردوە، كە بەرپرسانی یانەی شاهانە ئامادەن لە پێناو ئەو بەرگریكارە تەمەن 28 ساڵەدا بەهای 75 ملیۆن یۆرۆ بدەنە یانەی ناپۆلی، بەڵام پێشتر سەرۆكی یانەی ناپۆلی وتبوی هەر یانەیەك هەوڵ بۆ گواستنەوەی كۆلیبالی بدات، دەبێت 105 ملیۆن یۆرۆ بداتە یانەكەمان.



Copyright © 2017 Xendan.org all rights reserved

designed and developed by AVESTA GROUP