یەكەم لێدوانی مۆرینیۆ وەك ڕاهێنەری تۆتنهام

11/20/2019 11:11:00 AM 4081 جار خوێندراوەتەوە

خەندان سپۆرت

 

یانەی تۆتنهامی ئینگلیزی بەشێوەیەکی فەرمی خۆزێ مۆرینیۆ، راهێنەری پۆرتوگالی وەک راهێنەری یانەکەی دیاریكرد.

شەوی رابردو یانەی تۆتنهام ماوریسیۆ پۆچێتینۆی لە راهێنەرایەتی یانەكەی دورخستەوە و دوای 12 كاتژمێر بەشێوەیەکی فەرمی گرێبەستی لەگەڵ راهێنەری پێشوی مانچستەر یونایتد خۆزێ مۆرینیۆ ڕاگەیاند تا هاوینی 2023.

دوای دەستنیشانکردنی وەك راهێنەری نوێی تۆتنهام خۆزێ مۆرینیۆ لە یەكەمین  لێدوانیدا وتی " دڵخۆشم بە وەرگرتنی ئەرکی راهێنەرایەتی یانەکە و ستایشی هاندەران و ئەکادیمیای تۆتنهام دەكەم، تامەزرۆم بۆ ئەوەی لەگەڵ ئەو یانە گەورەیە و هاندەرە سەرنجڕاکێشانی و یاریزانە گەورەكانی دەست بە كاركردن بكەم"

مۆرینۆ دوای 345 رۆژ جارێکی دیکە دەگەڕێتەوە پرێمەرلیگ و لە گەڕی 13ی پرێمەرلیگ و لە یەكەمین یاریی خۆیدا وەك راهێنەر دەبێتە میوانی وێستهام یونایتد.

تۆتنهام لە ئێستادا بە کۆکردنەوەی 14 خاڵ لە پلەی چواردەمی پرێمەرلیگ دێت و لە کۆی 12 یاری تەنیا سێ یاریی سەركەوتنیان تۆماركردوە.

مۆرینیۆ کە 25 نازناوی لە کاروانی راهێنەرایەتی خۆی بەدەستهێناوە، رۆژی 4ی مانگی داهاتو دەبێتە میوانی مانچستەر یونایتد و لە نێو یاریگەی ئۆڵدترافۆرد، کە لە دیسێمبەری ساڵی رابردو لە راهێنەرایەتی یانەکە دورخرایەوە.



Copyright © 2017 Xendan.org all rights reserved

designed and developed by AVESTA GROUP