ئەو یاریگەیە دیاریكرا كە یارییەكانی عێراق لەخۆدەگرێت

11/7/2019 2:18:00 PM 2558 جار خوێندراوەتەوە

خەندان سپۆرت

 

دوای ئەوەی یەكێتی تۆپی پێی جیهانی بە فەرمی هەڵبژاردەی تۆپی پێی عێراقی ئاگاداركردەوە كە بۆیان نیە دو یاریی داهاتوی هەڵبژاردەكە لە ناو عێراق ئەنجام بدەن، بە هۆی خۆپیشاندانەكانی ئەم دوایەی ئەو وڵاتەوە، یەكێتی تۆپی پێی عێراق وڵاتی ئوردنی دەستنیشان كرد بۆ ئەوەی دو یاریی داهاتوی پاڵاوتنەكانی مۆندیال و جامی نەتەوەكانی ئاسیای 2023 لەو وڵاتە ئەنجام بدات.

عبدولخالق مەسعودی سەرۆكی یەكێتی تۆپی پێی عێراق لە لێداوانێكیدا بۆ كەناڵی كاس وتی.."لەگەڵ بڕیارەكەی فیفا دەرچو، وڵاتی ئوردن ئامادەی خۆیان نیشاندا بۆ ئەوەی یاریگەیەك تایبەت بۆ هەڵبژاردەكەمان دابین بكەن، بۆ ئەوەی یارییەكەنی هەڵبژاردەی عێراق بەرامبەر ئێران و بەحرەین لە سەر یاریگەی عمانی نێودەوڵەتی بەرێوەبچێت و هەمو ڕێكارە یاساییەكانیش بۆ ئەو مەبەستە دەگرنەبەر.

سەرۆكی یەكێتی تۆپی پێی عێراق وتیشی.." بە باشمان زانی ئەو یاریگەیە دەستنیشان بكەین، چونكە خێزانێكی زۆری عێراقییەكەكان لەو شارەدا بونیان هەیە و ئەمەش وا دەكات هاندەرێكی زۆر بۆ ئەو یارییانە ئامادەبن، لەگەڵ ئەوەشدا هەمو كارئاسانیەك كراوە بۆ ئەوەی هاوڵاتیان بتوانن لە عێراقەوە گەشت بكەن بەرەو ئەو وڵاتەو حكومەتی ئوردنیش ئامادەی دەربڕیوە كارئاسانی بكات لە پێدانی ڤیزا بە عێراقییەكان.

لە ناوەڕاستی ئەم مانگەدا هەڵبژاردەی عێراق بەرامبەر هەڵبژاردەی ئێران یاریی دەكات و پاشان روبەروی هەڵبژاردەی بەحرەین دەبێتەوە.


نیشانەکردن :

#عێراق

Copyright © 2017 Xendan.org all rights reserved

designed and developed by AVESTA GROUP