ڤیدیۆ.. پاریس سان جێرمان سەركەوتنی بۆ قۆناغی داهاتو مسۆگەركرد

11/7/2019 9:36:00 AM 904 جار خوێندراوەتەوە

خەندان سپۆرت

 

لە خولی یانە پاڵەوانەكانی ئەوروپا و لە قۆناغی كۆمەڵەكاندا و لە گەڕی چوارەمدا شەوی رابردو یانەی پاریس سان جێرمانی فەرەنسی لە نێو یاریگەی باخچەی شازادەكان میوانداری یانەی كلوب بروجی بەلجیكی كردو چوارەم سەركەوتنی لەسەر یەكی لە چامپیۆنس لیگ تۆماركرد.

لە نیوەی یەكەمی یارییەكە و لە خولەكی 22 ئەو هێرشبەری كۆنتی راهێنەری ئینتەر میلان بە زۆر لە یانەكەی دەریكرد، گۆڵی پێشكەوتنی بۆ پاریس تۆمار كرد، ئیكاردی لەو كاتەوەی پەیوەندی یبە یانە فەرەنسییەكەوە كردوە ئاستێكی جێگیر پێشكەش دەكات و لە زۆرینەی یارییەكاندا گۆڵ تۆماردەكات، نیوەی یەكەمی یارییەكەش لە بەرژەوەندی یانەی خاوەن یاریگە كۆتایهات.

لە نیوەی دوەمی یارییەكەدا یانەی كلوب بروج لە پێناو ئەوەی لە نێو ململانێی سەركەوتن بۆ قۆناغی دوەمی چامپیۆنس لیگ بمێنێتەوە، فشارێكی زۆریان خستبوە سەر گۆڵی یانەی خاوەن یاریگە، لە خولەكی 76 لێدانێكی سزا لە بەرژەوەندی كلوب بروج دروست بو، بەڵام مبای دیانی سەركەوتو نەبو لە جێبەجێكردنی و ئەنجامی یارییەكە وەك خۆی ماییەوە.

سەرئەنجام یانەی پاریس سان جێرمان توانی یارییەكە بە گۆڵێكی بێ وڵام لە بەرژەوەندی خۆی كۆتایی پێ بهێنێت و بە بێ گوێدانە ئەنجامی یارییەكانی داهاتو سەركەوتنیان بۆ قۆناغی دوەم مسۆگەر كرد.



Copyright © 2017 Xendan.org all rights reserved

designed and developed by AVESTA GROUP