مانێ باسی كریستیانۆ و مێسی دەكات

11/3/2019 4:37:00 PM 6004 جار خوێندراوەتەوە

خەندان سپۆرت

 

سادیۆ مانێ، هێرشبه‌ری سه‌نیگالی  و یاریزانی یانەی لیڤه‌رپوڵی ئینگلیزی، ئاشكرایدەكات كە خەونی ئەوەیە لە ژیانی پیشەگەریدا خەڵاتی باڵۆن دۆر بباتەوە.

لە لێدوانێكی رۆژنامەوانیدا مانێ وتی.. "نایشارمه‌وه‌ خەونی مناڵم بردنه‌وه‌ی باڵۆن دۆرە، ئه‌گه‌ر بتوانم ئەو نازناوە بەدەستبهێنم، ئەوا زۆر دڵخۆش ده‌بم".

گۆڤاری فرانس فوتبۆڵ ناوی 30 یاریزانی بڵاوكردەوە كە پاڵێوراون بۆ ئەوەی خەڵاتی باڵۆن دۆری ساڵی 2019یان پێبدرێت، مانێ یه‌كێكه‌ له‌و 30 یاریزانه‌ی ململانێ دەكات له‌سه‌ر بردنه‌وه‌ی باڵۆن دۆری 2019، كه‌ بڕیاره‌ رۆژی 2ی مانگی داهاتو ناوی براوه‌كه‌ ئاشكرا بكرێت.

مانێ له‌و باره‌وه‌ وتی "شانازییه‌كی گه‌وره‌یه‌ بۆ من كه‌ یه‌كێك بم له‌ پاڵێوراوانی باڵۆن دۆر، بەراستی هەوڵی زۆرمداوە لە پێناو ئەوەدا، ئه‌گه‌ر خەڵاتەكە ببەمەوە، هه‌مو گه‌لی سه‌نیگال و خانه‌واده‌كه‌م و خزم و كه‌سوكارم دڵخۆش ده‌بن".

مانێ لە درێژەی لێدوانەكەشیدا باسی لیۆنێل مێسی و كریستیانۆ رۆناڵدۆ كرد و وتی.." ئەو دو یاریزانە له‌ دوایین 11 ساڵدا به‌ هه‌ردوكیان 10 باڵۆن دۆریان بردۆته‌وه‌، بەراستی ئەوە كارێكی سەختە كە ئەو دو یاریزانە پێی گەیشتون، من دورم له‌ ئاستی ئه‌وان، به‌ڵام من هه‌وڵده‌ده‌م له‌وان نزیك ببمه‌وه‌و چەند خەڵاتێكی تاكە كەسی بەدەستبهێنم".


نیشانەکردن :

#مێسی #کریستیانۆ

Copyright © 2017 Xendan.org all rights reserved

designed and developed by AVESTA GROUP