ریاڵ مەدرید ئەستێرەیەكی بایرن میونشنی دەوێت

10/24/2019 12:36:00 PM 11712 جار خوێندراوەتەوە

خەندان سپۆرت

 

راپۆرتی رۆژنامەكانی ئیسپانیا ئاشكرایان كردوە كە یانەی ریاڵ مەدریدی ئیسپانی لە مێركاتۆی زستانەدا ریزەكانی یانەكەی نوێ دەكاتەوەو بۆ ئەو مەبەستەش چاوی لەسەر یاریزانێكی یانەی بایرن میونشنی ئەڵمانیە.

رۆژنامەی دەیلی مەیلی بریتانی ئاشكرایكردوە، كە بەرپرسانی یانەی شاهانە لە پێناو چارەسەركردنی كێشەكانی یانەكەیان رۆبێرت لیڤاندۆڤیسكی پۆڵەندی هێرشبەری یانەی بایرن میونشنی ئەڵمانیان دەستنیشانكردوە، بۆ ئەوەی لە گواستنەوەی زستانەی یاریزاناندا ئەو هێرشبەرە بۆ ریزەكانی یانەكەیان بگوازنەوە.

لە یارییەكانی ئەم وەرزەی خولی یانەكانی ئیسپانیا و خولی یانە پاڵەوانەكانی ئەوروپا یانەی ریاڵ مەدرید بە ئاستێكی ناجێگیردا تێدەپەڕێت، تا ئێستا لە خولی یانە پاڵەوانەكانی ئەوروپادا تەنها یەك یاریی سەركەوتنیان بەدەستهێناوە، هەر بۆیە كارگێڕی یانەكە كار بۆ ئەوە دەكات كە كێشەكانی یانەكە لە هێڵی پێشەوە چارەسەر بكەن بە گواستنەوەی لیڤاندۆڤیسكی، كە لە یارییەكانی ئەم وەرزەی خولی یانەكانی ئەڵمانیا و خولی یانە پاڵەوانەكانی ئەورپاش ئاستێكی بەرزی پێشكەش كردوە.

پێناچێت كارگێڕی یانەی بایرن میونشن بە ئاسانی دەستبەرداری ئەو یاریزانە بێت بۆ هیچ یانەیەكی دیكە، چونكە لە هێڵی پێشوی یانەكەیان دوای رۆیشتنی رۆبن و ریبێری تاكە یاریزانە كە یانەكە پشتی پێدەبەستێت.



Copyright © 2017 Xendan.org all rights reserved

designed and developed by AVESTA GROUP