ئەگەری هەیە یوێفا هەڵبژاردەی توركیا سزابدات

10/15/2019 4:52:00 PM 5978 جار خوێندراوەتەوە

خەندان سپۆرت

 

شەوی رابردو لە یارییەكانی پاڵاوتنی وڵاتای ئەوروپا بۆ گەیشتن بە یارییەكانی جامی نەتەوەكانی ئەوروپای 2020، هەڵبژاردەی فەرەنسا لە نێو یاریگەی "دو فرانس" میوناداری هەڵبژاردەی توركیای كرد، یارییەكەش بە گۆڵێك بۆ هەردو هەڵبژاردە كۆتایی هات، دوای تەواو بونی یارییەكەش یاریزانانی هەڵبژاردەی توركیا سڵاوی سەربازیان لە هاندەرانی هەڵبژاردەیەكەیان كرد، وەك پشتگیرییەك بۆ ئەو لەشكركێشیەی كە وڵاتەكەیان بۆسەر كوردانی رۆژئاڤا دەستی پێكردوە.

بەهۆی سڵاوی سەربازیانەی یاریزانانی هەڵبژاردەی توركیا ئەگەری زۆرە ئەو هەڵبژاردەیە لە لایەن یەكێتی تۆپی پێی ئەوروپاوە سزا بدرێت، چونكە هەر ئاماژەییەكی سیاسی لە نێو یاریگەكانی تۆپی پێدا سزای قورسی بە دوادا دێت.

لە خولەكی (76)ی یارییەكەدا كاتێك كان ئیهان گۆڵی بەرامبەر بۆ هەڵبژاردەی توركیا تۆمار دەكات، یەكێك لە یاریزانەكان سڵاوی سەربازی دەكات، بەڵام دەرهێنەری یارییەكە رێگەی نەدا بە زیاتر پیشاندانی ئەو گرتەیە.

دوای تەواو بونی یارییەكە جارێكی دیكە یاریزانانی هەڵبژاردەی توركیا لەگەڵ هاندەرانی هەڵبژاردەكەیان ئاهەنگیان گێڕاو جارێكی دیكە بە كۆمەڵ سڵاوی سەربازیان لە هاندەرەكانیان كرد، كە پێدەچێت یەكێتی تۆپی پێی ئەوروپا لەسەر ئەو ڕەفتارەی یاریزانانی هەڵبژاردەی توركیا سزایەكی توند بەسەر ئەو هەڵبژاردەیە بسەپێنێت.

لە ئێستادا هەڵبژاردەی توركیا لە یارییەكانی پاڵاوتنەكانی یۆرۆ بە كۆكردنەوەی 19خاڵ، پلەی دوەمی كۆمەڵەكەی گرتوەو فەرەنساش بەهەمان شێوە خاوەنی 19 خاڵی هەیە و پێشەنگی كۆمەڵەكەی گرتوە.


نیشانەکردن :

#یۆرۆی 2020 #یوفا

Copyright © 2017 Xendan.org all rights reserved

designed and developed by AVESTA GROUP