مانچینی ئامانجی داهاتوی هەڵبژاردەكەی ئاشكرادەكات

10/12/2019 12:38:00 PM 1425 جار خوێندراوەتەوە

خەندان سپۆرت

 

لەچوارچێوەی یارییەكانی پاڵاوتنی یۆرۆ بۆ گەیشتن بە كۆتاییەكانی جامی نەتەوەكانی ئەوروپای 2020، ئەمشەو هەڵبژاردەی ئیتاڵیا لە نێو یارییەگەی ئۆڵمپیكۆ بەرامبەر هەڵبژاردەی یۆنان دەوەستێتەوە.

ئەمشەو بۆ ئیتاڵیەكان جیاواز دەبێت چونكە درێسە نوێكەی هەڵبژاردەكە دەپۆشن كە درێسی سێیەم و رەنگی سەوزێكی تێرە، كە دوای 100 ساڵ ئەمە یەكەمین جارە ئەو هەڵبژاردەیە درێسی رەنگی سەوز بپۆشێت.

رۆبێرتۆ مانچینی راهێنەری هەڵبژاردەی ئیتاڵیا لە كۆنگرەییەكی رۆژنامەوانیدا پێش یارییەكەیان بەرامبەر یۆنان وتی.. " لە ئێستا ئامانجی ئێمە گەیشتنە بە كۆتاییەكانی یۆرۆی 2020، وە ئەركیشمان لەم یارییەدا ئاسان نیە، چونكە هەلبژاردەی یۆنان راهێنەرەكەیان گۆڕیوەو بە گڕوتینێكی دیكەوە بۆ ئەم یارییە ئامادەن، بەڵام پێویستە سەربكەوین و بگەینە یۆرۆ، ماوەی 50 ساڵە هەڵبژاردەی ئیتاڵیا نەیتوانیوە نازناوی جامی نەتەوەكانی ئەوروپا بەدەستبهێنێت، بۆیە هاندەران بە تامەزرۆییەوە چاوەڕێی بەدەستهێنانی ئەو نازناوەن، لەو پێناوەشدا ئێمە هەمو هەڵی خۆمان دەدەین بۆ ئەوەی ئەو نازناوە بەدەست بهێنین و ئەوە ئامانجی سەرەكی ئێمەیە، پاشان خۆمان بۆ یارییەكانی پاڵاوتنی مۆندیال ئامادە دەكەین".

مانچینی لە كۆتایدا وتی " لەو كاتەوەی ئەركی راهێنەرایەتی هەڵبژاردەی ئیتاڵیام وەرگرتوە، ئاستی ئەو هەڵبژاردەیە بەرەو باشترچوە، لەگەڵ ئەوەشدا توانیومانە شێوازی یاریكردنی هەڵبژاردەكە بگۆرین، ئەوەی مایەی خۆشحاڵیشە ئەوە كە پەیوەندی نێوان یاریزانانی هەڵبژاردەكە زۆر باشە".

لە ئێستا هەڵبژاردەی ئیتاڵیا پێشەنگی كۆمەڵەی دەیەمی یارییەكانی پاڵاوتنی یۆرۆی 2020ی گرتوە بە كۆكردنەوەی 18 خاڵ و تا ئێستا ئەو هەڵبژاردەیە تەنها سێ گۆڵی لێ تۆماركراوە و سەرجەم یارییەكانیشی بە بردنەوە كۆتایی پێهێناوە.


نیشانەکردن :

#ئیتاڵیا #یۆرۆی 2020

Copyright © 2017 Xendan.org all rights reserved

designed and developed by AVESTA GROUP