كچە وەرزشكارێكی هەولێر خەڵات كرا

10/8/2019 12:09:00 PM 1470 جار خوێندراوەتەوە

خەندان سپۆرت

 

دوای ئەوەی كچە یاریزانی یانەی هەولێر شۆخان نورەدین بوە گۆڵكار بە تۆماركردنی (50) گۆڵ و باشترین یاریزانی پاڵەوانێتی یانەكانی عەرەب بۆ تۆپی دەستی كچان دەستنیشانكرا.

د.عەبدوڵڵا مەجید سەرۆكی یانەی هەولێر پێشوازی لە كچە یاریزان شۆخان نورەدین-ی كرد.

سەرۆكی یانەی هەولێر ستایشی ئاستە بەرزەكەی شۆخانی كرد، كە توانی لە یەكەم پاڵەوانێتی لە دەرەوەی عێراق دوو نازناوی تاكە كەسی گرنگ بەدەستبهێنێت و سەرەنجی گشت چاودێرانی پاڵەوانێتیەكە بۆ خۆی رابكێشێت.

سەرۆكی یانەی هەولێر بریاری دا، كە پاداشتی شۆخان نورەدین بكات و هیوای خواست لەم ئاستە بەرزەی بەردەوام بێت و بتوانێت لە پاڵەوانێتیەكانی داهاتوو زیاتر ئاستی خۆی پێشبخات.

جێگەی باسە لەم پێشوازییە هەریەكە لە بێجان ئیبراهیم ئەمینداری دارایی یانە و سەركەوت موحسین سەرپەرشتیاری تیپ و پەرێز شێروانی كچە یاریزانی یانەی هەولێر ئامادەبون.

دوای تەواوبونی پاڵەوانێتی یانەكانی عەرەبی بۆ تۆپی دەستی كچان، كە لە وڵاتی ئوردن بەرێوەچو راهێنەری تیپەكە عامر مەهدی بەفەرمی دەستلەكاركێشانەوەی خۆی لە راهێنەرایەتی تیپەكە راگەیاند بەهۆكاری تایبەت بەخۆی.


نیشانەکردن :

#ناوخۆیی

Copyright © 2017 Xendan.org all rights reserved

designed and developed by AVESTA GROUP