دواین گرێبەستی بەرشەلۆنە بۆ پاریس سان جێرمان

8/19/2019 6:49:00 PM 23298 جار خوێندراوەتەوە

خەندان سپۆرت

 

راپۆرتی رۆژنامەكانی ئیسپانیا ئاشكرایان كردوە، كە سەرۆكایەتی یانەی بەرشەلۆنەی ئیسپانی ئەمرۆ كۆبونەوەیەكیان ئەنجامداوە بۆ بڕیاریدان لەسەر گواستنەوەی نێیمار و دواین بڕیاری خۆیان داوە لە بارەی چۆنێتی پێشكەشكردنی دواین گرێبەست بە یانەی پاریس سان جێرمان.

دوای رۆیشتنی كۆتینیۆ و پەیوەندی كردنی بە یانەی بایرن میونشی ئەڵمانییەوە ئەو یانە ئیسپانیە هەوڵەكانی چڕتركردۆتەوە لە پێناو گواستنەوەی نێیمار بۆ ریزەكانی یانەكەی.

رۆژنامەكانی ئیسپانیا باس لەوە دەكەن كە دواین بڕیاری یانەی بەرشەلۆنە دوای كۆبونەوەی ئەمرۆی ئەندامانی دەستەی سەرۆكایەتی یانەكە ئەوەیە كە بە شێوەی خواستن ئەو یاریزانە بگوازنەوە لەگەڵ مافی كرینەوەی یاریزانەكە بە ناچاری، ئەمەش بەهۆی ئەو قەیرانە دارییەوەیە كە بەرۆكی یانە ئیسپانییەكەی گرتوە.

یانەی پاریس سان جێرمان بەهای 180 ملیۆن یۆرۆی لەسەر گواستنەوەی نێیمار داناوە، یانەی بەرشەلۆنەش بەهۆی گرێبەستی گریزمانەوە توانای دابین كردنی ئەو بڕە پارەیەی نیە كە پاریس داوای دەكات، یانەی ریاڵ مەدریدیش چاوەڕێی شكستی گفتوگۆكانی نێوان هەردو یانە دەكات و ئامادەیە گرێبەستێك بە بەهای 180 ملیۆن یۆرۆ پێشكەشی یانەی پاریس سان جێرمان بكات لە پێناو گواستنەوەی نێیمار. 



Copyright © 2017 Xendan.org all rights reserved

designed and developed by AVESTA GROUP