ریاڵ مەدرید پلانێكی نوێ بۆ گواستنەوەی نێیمار دادەنێت

8/18/2019 3:54:00 PM 14650 جار خوێندراوەتەوە

خەندان سپۆرت

 

تا ئێستا بە شێوەیەكی فەرمی داهاتوی نێیمار داسیلڤای بەرازیلی و یاریزانی یانەی پاریس سان جێرمانی فەرەنسی بە شێوەیەكی تەواوەتی یەكلا نەبۆتەوەو داهاتوی ئەو یاریزانە دیار نیە كە لە كام جەمسەری یانەی ئیسپانیا دەبێت، چونكە هەردو یانەی ریاڵ مەدرید و بەرشەلۆنە گرنگی بە تواناكانی ئەو یاریزانە بەرازیلیە دەدەن.

فلۆرەنتینۆ پێرێزی سەرۆكی یانەی ریاڵ مەدریدی ئیسپانی خەون بە گواستنەوەی ئەو یاریزانە دەبینێت و ماوەیەكی زۆرە كار بۆ ئەوە دەكات گواستنەوەی نێیمار بكاتە بۆمبی مێركاتۆ.

راپۆرتی رۆژنامەكانی ئیسپانیا باس لەوە دەكەن، كە یانەی ریاڵ مەدریدی ئیسپانی پلانی نوێی بۆ گواستنەوەی ئەو یاریزانە داناوەو چاوەڕێ دەكات تا یانەی بەرشەلۆنە لەگەڵ یانەی پاریس سان جێرمان لە گفتوگۆی گواستنەوەی ئەو یاریزانە شكست بهێنێت، بۆ ئەوەی دەستبەجێ گرێبەستی نوێ پێشكەشی یانە فەرەنسییەكە بكەن.

وەك ڕۆژنامە فەرەنسییەكان باسی لێوە دەكەن، یانەی پاریس سان جێرمان ئامادەیە بە بەهای 180 ملیۆن یۆرۆ دەستبەرداری نێیمار بێت، لە ئەگەری شكستهێنانی یانەی بەرشەلۆنە لە دواین گفتوگۆی لەگەڵ یانەی پاریس سان جێرمان كە بڕیارە سبەی ئەنجام بدرێت، بەرپرسانی یانەی شاهانە گرێبەستێك بە بەهای 180 ملیۆن یۆرۆ پێشكەشی یانە فەرەنسییەكە دەكەن لە پێناو گواستنەوەی ئەو هێرشبەرە بەرازیلییە، كە هەمان ئەو بڕەیە كە یانە پاریسییەكە داوای دەكات.



Copyright © 2017 Xendan.org all rights reserved

designed and developed by AVESTA GROUP