بە وێنە.. دەستێكی نیە و ئەستێرەیەكی تۆپی پێی هاوشێوەی خۆی دەبینێت

7/28/2019 10:07:00 AM 2502 جار خوێندراوەتەوە

خەندان سپۆرت

 

وێنەیەكی ناوازەی منداڵێك تۆڕە كۆمەڵایەتیەكانی هەژاند، لە وێنەكەدا ئەو منداڵە دەستێكی نیە و سڵاو لە ئەستێرەیەكی تۆپی پێ دەكات كە هاوشێوەی خۆی دەستێكی نیە.

جۆزێف تید، ئەو منداڵە 21 مانگانەیە كە بەهۆی ئەوەی پێش لەدایكبونی توشی ناتەواوی گەشەنەكردنی پەلەكانی بوە، دەستێكی لە ئانیشكیەوە نیە و بە مەبەستی زیاتركردنی هۆشیاری لەبارەی دۆخی دەستیەوە ناوبەناو وێنەی خۆی لە تۆڕی كۆمەڵایەتی ئینستاگرام بڵاودەكاتەوە، بەڵام یەكێك لە وێنەكانی بەخێرایی بەناو تۆڕە كۆمەڵایەتیەكاندا بڵاوبوەوە.

جۆزێف، وێنەیەكی لەگەڵ كارسۆن پیكێت-دا چركاندوە، كە ئەستێرەیەكی یاری تۆپی پێیەو هەمان كێشەی هەیە، ئەو ئەستێرەیەی تۆپی پێش بەهۆی گەشەنەكردنی پەلەكانیەوە دەستێكی نیە.

لە وێنەكەدا هەریەك لە جۆزێف و پیكێت بەو قۆڵەیان كە دەستی پێوە نیە سڵاو لە یەكدی دەكەن و زەردەخەنەیەكی مەزن لە روخساری هەردوكیاندا بەدیدەكرێت، جوانی ئەو وێنەیە بوەتە دروستكردنی هەمان زەردەخەنە لەسەر لێوی بەكارهێنەرانی تۆڕە كۆمەڵایەتیەكان و بەوهۆیەوە بە شێوەیەكی خێرا بڵاوبوەوە.

هۆكاری گەشەنەكردن و كورتهێنانی پەلەكان لە كۆرپەلەدا تا ئێستا بە شێوەیەكی تەواو نەزانراوە، بەڵام بەپێی توێژینەوەكان ، دەكرێت هەندێك جوڵە و بەركەوتن لەكاتی دوگیانبونی خانمانداو هاوكات لەگەڵ وەرگرتنی هەندێك جۆر لە ماددەی كیمیایی و دەرمان، مەترسی دروستبونی ئەو كێشەیە لە كۆرپەلەدا دروستبكات.

بەپێی ناوەندی بەرەنگاربونەوە و رێگرتن لە نەخۆشیەكان، لە ویلایەتە یەكگرتوەكان ساڵانە دو هەزار و 50 كۆرپە لەكاتی لەدایكبونیاندا كێشەی پەلی گەشەنەكردویان هەیە، كە هەزار و 500 منداڵ لەو منداڵانە لە پەلەكانی سەرەوەیاندا توشی ئەو حاڵەتە دەبن و 750ی دیكەشیان لە پەلەكانی خوارەوەیاندا.


نیشانەکردن :

#گشتی #جیهان

Copyright © 2017 Xendan.org all rights reserved

designed and developed by AVESTA GROUP