ئەمشەو یاریی كۆتای یۆروپا لیگ ئەنجام دەدرێت

5/29/2019 10:35:00 AM 2754 جار خوێندراوەتەوە

خەندان سپۆرت

 

لە یاریی كۆتایی پاڵەوانێتی یۆروپا لیگ ئەمشەو كاتژمێر 10 بە كاتی هەرێم هەردوو یانەكەی شاری لەندەن چێڵسی و ئارسناڵ لە پێناو بەدەستهێنانی نازناوێكدا دەجەنگن.

هەردوو یانەكە زۆر بە باشی خۆیان بۆ ئەم یارییە ئامادە كردوەو هەریەكێكیان جگە لە نازناوەكە ئامانجێكی دیكەشیان هەیە، یانەی ئارسناڵ لەگەڵ ئەوەی چاوی لە پاڵەوان بونە دەیەوێت لەم رێگەییەوە خۆی بۆ بگەیەنێتە یارییەكانی وەرزی داهاتوی چامپیۆنس لیگ، ساریش نایەوێت ئەم وەرزە بە بێ دەسكەوت لەگەڵ چێڵسی كۆتایی پێ بهێنێت و دەیەوێت ئەم نازناوە بباتەوە لە پێناو ڕازیكردنی دڵی هاندەرانیدا.

هاندەرانی یانەی چێڵسی بەردەوام رەخنەیان ئاراستەوەی ئەو راهێنەرە ئیتاڵیە كردەوەو لەگەڵ شێواز و چۆنێتی یاریكردنی ئەو راهێنەرە كۆك نین و پێیان وایە دورخستەنەوەی ساری لەبەرژەوەندی یانەكەیەو فرانك لامپارد بۆ چێڵسی گونجاوەو ئەستێرەی پێشوی یانەكەیەو شارەزاییەكی زۆری هەیە لە شێوازی یاریكردنی چێڵسی.

لە یانەی بلوز بۆ یارییەكەی ئەمشەو چاوەڕێ دەكرێت نگۆلۆ كانتی بەهۆی پێكانەوە بەشداری نەكات و هۆدسۆن ئۆدۆێ و لۆفتۆس چیك بەهۆی پێكانەوە بەشداری نەكردنیان یەكلا بۆتەوە.

لەلایەكی دیكەوە یانەی ئارسناڵە كە ئۆنای ئێمری سەرپەرشتی ئەو یانەیە دەكات و پێشتر لەگەوڵ یانەی ئیشبیلیە سێ جار نازناوی ئەو پاڵەوانێتیەی بردۆتەوە ، بەڵام لە یارییەكانی ئەم وەرزە نەیتوانیوە  ئارسناڵ بگەیەنێتە چامپیۆنس لیگ و دەیەوێت لەم رێگەیەوەو بە پاڵەوان بونی یانەكە سەر بخات بۆ چامپیۆنس لیگ.

یانەی ئارسناڵ خاوەنی كۆمەڵێك یاریزانی بەتوانایەو لە هێڵی پێشەوە ئۆبامیانگ و لاكازایتی هەیە كە لە یارییەكانی ئەم وەرزە لەگەڵ ئارسناڵ ئاستێكی ناوازەیان پێشكەش كردوە.

بۆ ئەم یارییە ئارسناڵ بێبەشە لە تواناكانی میخیتاریانی ئەرمینیای كە بەهۆی كێشەوی سیاسی لە نێوان ئازەربایجان و ووڵاتەكەی نەیتوانیوە لەگەڵ یاریزانەكانی هاوڕێی گەشتی باكۆ بكات، هەرچەندە یوێفا پێشتر دڵنیایی سەلامەتی دابوە ئەو یاریزانە، بەڵام تەنانەت ئەگەر هاندەرێكیش درێسی ئەو یاریزانەی پۆشیبێت لەلایەن پۆلیسی ئەو ووڵاتەوە راگیراوە.

ئەمە جگە لەوەی باكۆ كێشەی سیاسی هەیە و ئەمە بۆتە رەخنە لای هاندەران لەلایەكی دیكەوە بەهۆی دووری ئەو ووڵاتەوە كێشە بۆ هاندەرانی هەردوو یانە ئینگلیزییەكە دروست بوەو  زۆرینەی ئەو تكتانەی بۆ هاندەرانی هەردوو یانە دابین كرابون گەڕێندراوەتەوە بۆ یەكێتی تۆپی پێ ئەوروپا.  



Copyright © 2017 Xendan.org all rights reserved

designed and developed by AVESTA GROUP