"ئاژۆی شازادە دیانا هەڵدەگرنەوە"
بە فەرمی.. چیدی هاری و مێگان لە خێزانی شاهانەیی بریتانیادا هەژمارناكرێن


خەندان لایف

كۆشكی شاهانەیی شانشینی یەكگرتوی بریتانیا رایگەیاند، بە شێوەیەكی فەرمی چیدی هەریەك شازادە هاری و مێگان ماركڵ-ی هاوژینی لەنێو خێزانی شاهانەیی شانشینی یەكگرتوی بریتانیادا هەژمارناكرێن.

لەمیانی راگەیەندراوێكیدا، ئێلیزابێس-ی دوەم، شاژنی بریتانیا بڵاویكردەوە "هەریەك لە شاژادە هاری و مێگان ماركڵ-ی هاوژینی نازناوی شاهانەیی-ان لێدەسێنرێتەوە و ئەوەش بەپێی رێككەوتنێكە سەبارەت بە دەستبەرداربونی ئەو دو شازادەیە لە خێزانی شاهانەیی".

لەكاتێكدا لە ماوەی رابردودا هاری مێگان، ئەو دو ناوەی لە سەرەتای ئاشكرابونی پەیوەندیی خۆشەویستیان تا ئەم دەمە لەنێو باس و خواسی رۆژنامە و پێگەكانی هەواڵدان و بە شازادەكانی سەسكس ناویاندەهێنرا، بەگوێرەی كۆتا بڕیار چیدی لەگەڵ ناوهێنانیاندا وشەی "شازادە" بەكارناهێنرێت.

لە راگەیەندراوەكەی شاژنی بریتانیادا هاتوە "لەمەودوا نازناوی شاهانەیی تایبەت بە خێزانی شاهانەیی بریتانیا و وشەی شازادە بۆ مێگان و هاری بەكارناهێنرێت و بە شێوەیەكی فەرمی یەكێك نین لە نوێنەرانی خێزانی شاهانەیی بریتانیا"، بەوپێیە لەپاڵ ناوی هاری و مێگان تەنها دۆقی سەسكس بەكرادەهێنرێت.

رۆژنامە بریتانییەكان ئاماژە بەوەدەكەن، ئەو هەنگاوەی هاری و مێگان، هەمان هەنگاوی 24 ساڵ لەمەوبەری شازادە دیانا-ی دایكی هاری-ە، كە بە شازادەی وەیڵز ناسرابو و بە جیابونەوەی لە شازادە شارڵز-ی باوكی هەریەك لە شازادە ویڵیام و هاری، دەستبەرداری نازناوی شاهانەیی بو.

دوێنێ شەممە، كۆشكی بەكینگهام-ی شاهانەیی بریتانیا لە راگەیەندراوێكدا ئاماژەی بەوەكرد "هەریەك لە شازادە هاری و هاوژینەكەی لەگەڵ كوڕەكەیاندا چیدی ئەندامی كارای خێزانی شاهانەیی نین و لە ریزی خێزانەكەدا كارناكەن، لێرە بەدواوە لەڕێگەی خێزانی شاهانەییەوە هیچ پشتیوانیەكی داراییان پێنادرێت".

هەر بەگوێرەی ئەو راگەیەندراوە "پێویستە لەسەر هاری و مێگان لە دەستپێكی جیابونەوەیان لە خێزانەكە ئەو بڕە پارەیەی لە نوێكردنەوە و نۆژەنكردنەوەی شوێنی مانەوەیاندا لە رۆژئاوای لەندەن خەرجیانكردوە، بیگەڕێننەوە بۆ خەزێنەی خێزانی شاهانەیی".

لە راگەیەندراوەكەی شاژنە ئێلیزابێس-دا هاتوە "هاری و مێگان و كوڕەكەیان ئارچی، وەكو ئەندامانی خێزانەكە جێگەی رێز و خۆشەویستی خانەوادەكەم دەبن، بەڵام چیدی نوێنەرایەتی خێزانەكە ناكەن و پشتیوانی لەو خواستەیان دەكەن كە ویستی بەدەستهێنانی ژیانێكی ئازادانەتریان هەیە".

وتەبێژی كۆشكی بەكینگهام-یش رایگەیاند "سەرەڕای ئەوەی چیدی هاری و مێگان بە فەرمی نوێنەرایەتی خێزانی شاهانەیی ناكەن، بەڵام رونیانكردوەتەوە كە لە هەر كارێكدا ئەنجامیدەدەن، رێز لە پێگەی شاهانەیی شاژن دەگرن".

سەرچاوەیەكی كۆشكی شاهانەییش ئاشكرایكرد "سەرەڕای ئەوەی سەرجەم پاڵپشتییە داراییە گشتیەكان لە خێزانی شاهانەییەوە بۆ هاری و مێگان دەوەستێندرێت، بەڵام  چارڵز-ی شازادەی جێنشین كە باوكی هاری-ە، بە شێوەیەكی تایبەتی پاڵپشتی داراییان دەكات".  

چوارشەممەی رابردو، 8ی كانونی دوەمی ئەمساڵ هەریەك لە شازادە هاری و مێگان-ی هاوژینی لە بڕیارێكی كتوپڕدا رایانگەیاند "بە فەرمی دەستبەرداری نازناوی شاهانەییان دەبن و دەیانەوێت دەست بە كارێكی دیكە بكەن كە كاتی زێدەتریان بداتێ بۆ گەشتكردن بۆ ئەمریكای باكور، لە هەمانكاتدا لەروی ئابورییەوە سەربەخۆیی وەربگرن".

هەفتەی رابردوش كۆشكی  شاهانەیی بەكینگهام رایگەیاند "شاژنە ئێلیزابێسی دوەم، شاژنی بریتانیا رێككەوتوە لەگەڵ شازادە هاری و هاوژینەكەیدا سەبارەت بە (ماوەیەكی كاتی) تا دەركردنی كۆتا بڕیار ".

بەپێی رێككەوتنەكە، رێگە بە هاری و مێگان دەدرێت لەنێوان كەنەدا، كە شوێنی لەدایكبونی مێگان-ە و شانشیینی یەكگرتوی بریتانیادا هاتوچۆبكەن و لەنێو ئەو دو وڵاتەدا ژیانیان بەڕێبكەن، ئەوەش لەسەر بنەمای رێككەوتنێكی ئەندامانی خێزانی شاهانە بڕیاری لەسەردراوە.

رێكەوتی 28ی ساڵی 1996، لەگەڵ شازادە چارڵز-ی جێنشیندا بڕیاری جیابونەوەیان واژۆكرد و بەو هەنگاوەش دیانا دەستبەرداری نازناوی شازادەی وەیڵز بو، رێكەوتی 31ی ئاب-ی 1997یشدا و بە روداوێكی پێكدادانی ئۆتۆمبێل كە تائێستاش دۆسیەكە جێی گومانە، گیانیلەدەستدا.

 

ئه‌م بابه‌ته 16530 جار خوێنراوه‌ته‌وه‌‌



Copyright © 2015 Xendan.org all rights reserved
Created by AVESTA GROUP