دێمیرتاش "لەیلان" بڵاودەكاتەوە


خەندان-

هاوسەرۆكی پێشوی پارتی دێموكراتی گەلان (هەدەپە)، لە زیندانەوە سێهەمین پەرتوك دەخاتە بەردەست خوێنەرانی، كە ناوەرۆك و شێوازی نوسینەكەی لە پەرتوكەكانی پێشوی جیاوازترە.

سەڵاحەددین دێمیرتاش، هاوسەرۆكی پێشوی پارتی دێموكراتی گەلان (هەدەپە)، كە ماوەی زیاتر لە سێ ساڵە بە تۆمەتی "پشتگیریكردنی ئەو گروپ و دەستانەی لە لایەن دەسەلاتی توركیاوە بە تێرۆریست ناودەبرێن" لە گرتوخانەی ئێدیرنێ زیندانیكراوە، سێهەمین پەرتوكی خۆی بەناوی "لەیلان" بڵاودەكاتەوە، كە ئەمجارەیان ناوەرۆكی پەرتوكەكەی "رۆمان"ە.

رۆمانی لەیلان، لەنێو 300 لاپەڕەدا هۆنراوەتەوە و پێشكەشكراوە بە هەریەك لە باشاك دێمیرتاش-ی هاوژینی سەڵاحەددین دێمیرتاش و هەردو رۆڵەكەیان دەلال و دڵدا، لە پێشەكی پەرتوكەكەدا دێمیرتاش نوسیویەتی "پێشكەشە بە باشاك و هەردو گوڵە گەنمەكەی: دەلال و دڵدا"، لە دیزاینی بەرگی پەرتوكەكەشدا دو گوڵە گەنم هەیە وبە هەردو رەنگی سپی و سەوز زۆر بە ساكاری نەخشێندراوە.

خانەی چاپ و بڵاوكردنەوەی دیپنۆت لە پێگەی فەرمی خۆی لە ئینستاگرام رایگەیاندوە "لەیلان، رێكەوتی 22ی كانونی دوەمی ئەمساڵ دەكەوێتە بەردەستی خوێنەران و دەتوانن لە پەرتوكخانەكان دەستیانبكەوێت".

بێجگە لە لەیلان، دێمیرتاش نوسەری هەریەك لە پەرتوكەكانی سەحەر و دەوران-ە، كە یەكەمینیان لەسەر شێوەی كورتەچیرۆك و دوەمینیشیان بە هەمانشێوە بەڵام زیاتر لەسەر شێوازی شانۆگەری نوسراوە، لە هەردو پەرتوكەكەشدا بە زمانێكی ساكار ژمارەیەك پرسی گەورەی داڕشتوەتەوە، كە رۆژانە دێنە بەردەم هەر تاكێكی كۆمەڵگە جیاوازەكان، بە تایبەتی كۆمەڵگەكانی رۆژهەڵاتی ناوەڕاست.

ئه‌م بابه‌ته 3766 جار خوێنراوه‌ته‌وه‌‌



Copyright © 2015 Xendan.org all rights reserved
Created by AVESTA GROUP