ترودۆ مەرج دادەنێت بۆ نیشتەجێبونی هاری و مێگان لە كەنەدا

خەندان لایف

پێش ئەوەی هەریەك لەشازادە هاری و مێگان ماركڵ-ی هاوژینی بچنە كەنەدا، سەرۆك وەزیرانی ئەو وڵاتە مەرجی دانا بۆ چونە نێو وڵاتەكە، ئەوەش پاش رەزامەندی دەربڕینی شاژنی بریتانیا لەسەر بڕیارەكە.

لەمیانی لێدوانێكیدا بۆ تەلەڤزیۆنی فەرمیی كەنەدا، جەستن ترودۆ-ی سەرۆك وەزیرانی ئەو وڵاتە شەوی دوێنێ دوشەممە رایگەیاند "سەبارەت بە هاتنی هەردو ئەندامی بنەماڵەی شاهانەیی، شازادە هاری و مێگان ماركڵ-ی هاوژینی ژمارەیەك بابەتی زۆر هەیە كە دەبێت باسیان لێوەبكەین، یەكێكیش لەوانە تێچوی تایبەتە بە پاراستنیان".

ئاماژەی بەوەشكرد "پێویستە ئەو بڕیارانە لەلایەن خێزانی شاهانەی بریتانیاوە بەئەنجامبگەیەندرێن و لە لایەن هەریەك لە مێگان و هاری-یەوە دەبێت ئەوەش رونبكرێتەوە ئاستی بەشداریكردنیان لە كۆمەڵگەی كەنەدا چۆن و تا چەند دەبێت".

ترودۆ رونیشیكردەوە "بە دڵنیاییەوە پشتیوانی لە بیرۆكەكانی هەردو ئەندامی خێزانی شاهانە دەكەن. بەڵام هەندێك بەرپرسیارییەتی و پابەندی هەیە لەوبارەیەوە كە پێویستە یەكلایی بكرێنەوە، سەبارەت بە هەنگاوی نیشتەجێبونیشیان تێچوی ئەو پرسە، تا ئێستا دانوستان و راوێژ بە حكومەتی فیدراڵی نەكراوە".

ئەو وتانەی ترودۆ پاش ئەوەدێت هەفتەی رابردو كۆشكی  شاهانەیی بەكینگهام رایگەیاند "شاژنە ئێلیزابێسی دوەم، شاژنی بریتانیا رێككەوتوە لەگەڵ شازادە هاری و هاوژینەكەیدا سەبارەت بە (ماوەیەكی كاتی) تا دەركردنی كۆتا بڕیار ".

بەپێی رێككەوتنەكە، رێگە بە هاری و مێگان دەدرێت لەنێوان كەنەدا، كە شوێنی لەدایكبونی مێگان-ە و شانشیینی یەكگرتوی بریتانیادا هاتوچۆبكەن و لەنێو ئەو دو وڵاتەدا ژیانیان بەڕێبكەن، ئەوەش لەسەر بنەمای رێككەوتنێكی ئەندامانی خێزانی شاهانە بڕیاری لەسەردراوە.

 

ئه‌م بابه‌ته 25868 جار خوێنراوه‌ته‌وه‌‌



Copyright © 2015 Xendan.org all rights reserved
Created by AVESTA GROUP