ئەو هۆكارانەی ئەگەری توشبون بە نەخۆشیەكانی دڵ زیاد دەكەن


خەندان لایف

نەخۆشی دڵ یەکێکە لەو نەخۆشیانەی بە گشتی لە هەمو تەمەنێکدا هەیە و لەناو خەڵکیدا باوە، چەندین هۆکاری جیاواز هەیە کە ئەگەری توشبون بەم نەخۆشیە زیاد دەکات، بەڕێوبەرایەتی تەندروستی گشتی سلێمانی ئەو هۆکارنەی بڵاوکردوەتەوە کە ئەگەری توشبون بە نەخۆشی دڵ زیاد دەکەن.

یەکەم: تەمەن
هەڵكشانی تەمەن مەترسی تێكچون و تەسكبونەوەی خوێنبەرەكان و تێكچونی ماسولكەی دڵ زیاد دەكات.

دوەم: ڕەگەز
ئەگەری توشبونی پیاوان بەنەخۆشیەكانی دڵ زیاترە.

سێیەم: مێژوی خێزان
بونی نەخۆشی دڵ لەناو خێزان ئەگەری توشبون بەو نەخۆشیە زیاد دەكات.

چوارەم: جگەرەكێشان
ماددەی نیكۆتین دەبێتە هۆی كشانی دەمارەكان و دوەم ئۆكسیدی كاربۆن زیان بەناوپۆشی دەمارەكان دەگەیەنێت وادەكات رەق بێت، بۆیە رێژەی توشبون بە جەڵتەی دڵ لای كەسانی جگەرەكێش زیاترە.

پێنجەم: هەندێك دەرمان و چارەسەری كیمیایی و تیشك 
هەندێك كات ئەو جۆرە چارەسەرانە مەترسی توشبون بەنەخۆشیەكانی دڵ و دەمارەكان زیاددەكات.

شەشەم: سیستمی خۆراك
پەیڕەوكردنی سیستمی خۆراكی دەوڵەمەند بەچەوری و خوێ و شەكر و كۆلیسترۆل ئەگەری توشبون بەنەخۆشیەكانی دڵ زیاد دەكات.

حەوتەم: بەرزەپەستانی خوێن
ئەگەر چارەسەرنەكرێت دەبێتە هۆی رەقبون و تەسكبونەوەی دەمارەكان.

هەشتەم: بەرزی رێژەی كۆلیسترۆل لەخوێن
دەبێتە هۆی كۆبونەوەی چەوری و رەقبونی خوێنەبەرەكان.

نۆیەم: شەكرە
ئەم نەخۆشیە و قەڵەوی و بەرزەپەستانی خوێن یەكێكن لەو هۆكارانەی ئەگەری توشبون بەنەخۆشیەكانی دڵ زیادەكات.

دەیەم: كەمی جوڵە و فشاری دەرونی
ئەم هۆكارانە دەبنە هۆی تێكچونی دەمارەكان و سەرهەڵدانی كێشەی دیكە كەدەبنە هۆی توشبون بەنەخۆشیەكانی دڵ.

یانزەیەم: پشتگوێخستنی پاكوخاوێنی
نەشۆردنی بەردەوامی دەستەكان و نەگرتنەبەری رێوشوێنی تەندروستی بۆ خۆپاراستن لەتوشبون بە ڤایرۆس و بەكتریا مەترسی توشبون بەنەخۆشیەكانی دڵ زیاد دەكات.

 

ئه‌م بابه‌ته 11758 جار خوێنراوه‌ته‌وه‌‌

Copyright © 2015 Xendan.org all rights reserved
Created by AVESTA GROUP