نیشانه‌كانی هه‌ڵامه‌ت و ئه‌نفله‌وه‌نزا، شێوازی چارەسەرکردنی بەرێگای سروشتی

خەندان لایف- شنه‌ عومه‌ر عه‌لی
 
گومان له‌وه‌دا نییه‌ وه‌رزى سه‌رما و سۆڵه‌ به‌ڕێوه‌یه‌، و زۆربه‌مان توشی هه‌ڵامه‌ت و سه‌رئێشه‌ و ئه‌نفله‌وه‌نزا ده‌بین، بەدوای چارەسەریکی باشدا دەگەڕێین بۆ ئەوەی لەو نەخۆشیە رزگارمان ببێت، ده‌توانین به‌بێ به‌كارهێنانى هیچ ده‌رمانێكی دژه‌ ڤایرۆس، چه‌ند هه‌نگاوێكی ساده‌ بگرینه‌ به‌ر بۆ چالاككردنی سیستمی به‌رگری له‌ش و له‌ناوبردنی كۆكه‌ و نیشانه‌كانی سه‌رمابون و له‌ ماوه‌یه‌كی كه‌مدا.
لەگەڵ ئەوەی ئەنفلەوەنزا و هەڵامەت دو نەخۆشی جیاوازن بەڵام دەکرێت هەمان چارەسەریان بۆ بەکاربهێندرێت.

نیشانه‌كانی هه‌ڵامه‌ت:
- ئاوهاتن له‌ لوت یاخود لوت گیران.
- برینداربونی گه‌رو.
- خوێنتێزان.
- سه‌رئێشه‌.
- پژمین.
- تا لێهاتن.
- هه‌ستكردن به‌ بێتاقه‌تی.

نیشانه‌كانی ئه‌نفله‌وه‌نزا:
ئه‌نفله‌وه‌نزا نه‌خۆشییه‌كی په‌تاى ڤایرۆسییه‌، نیشانه‌كانیی له‌ هه‌ڵامه‌ته‌وه‌ نزیكه‌، به‌ڵام خێراتر ده‌ر ده‌كه‌ون و مه‌ترسیدارترن.

- تالێهاتنی كتوپڕ (30-40°C).
- ئازارى ماسولكه‌كان.
- ئاره‌قكردنه‌وه‌.
- بێتاقه‌تی.
- كۆكه‌ى وشك و پژمه‌ى به‌هێز.
- بێتوانایی له‌ ئه‌نجامدانى كارى رۆژانه‌ و مانه‌وه‌ له‌ جێگا به‌ به‌رده‌وامی.

چاره‌سه‌رى سروشتیی هه‌ڵامه‌ت و ئه‌نفله‌وه‌نزا:
- پشودان.
- خواردنەوەی بڕێکی زۆر لە شلەمەنی.
- خوادنی خۆراکی تەندروست، ئه‌گه‌ر گه‌روت زامدار بوبێت خواردنەوەی شۆربای گەرم بەسودە.
- له‌ كاتی كۆكه‌ و پژمیندا  كلێنكس به‌ ده‌م و لوتته‌وه‌ بگره‌.
- به‌ به‌رده‌وامی ده‌سته‌كانت بشۆ.
- جه‌لاتینی تایبه‌ت به‌  ده‌ست به‌كاربهێنه‌ بۆ رێگریكردن له‌ بڵاوبونه‌وه‌.

ئەو خۆراکانەی بەسودن بۆ زو چارەسەرکردنی
ده‌توانین چه‌ند ده‌رمانێكى سروشتی له‌ ماڵه‌وه‌ درووست بكه‌ین بۆ به‌هێزكردنی به‌رگری له‌ش له‌ كاتی توشبون، هه‌روه‌ها ده‌كرێت بۆ خۆپاراستنیش بخورێن.

یەکەم: گوڵه‌ به‌یبون
له‌ رێگه‌ى چه‌ندان توێژینه‌وه‌ سه‌لمێنراوه‌ گوڵه‌ به‌یبون ده‌بێته‌ هۆى زو چاكبوونه‌وه‌ له‌ هه‌ڵامه‌ت و ئه‌نفله‌ونزا و رێگریش ده‌كات له‌ توشبون، ده‌توانیت رۆژانه‌ وه‌ك چای له‌گه‌ڵ ئاوى كوڵاودا بیخۆیته‌وه‌، هاوكات به‌ شێوه‌ى هاڕاوه‌، نوقڵ و حه‌بیش له‌ ده‌رمانخانه‌كاندا به‌رده‌سته‌.

دوەم: ره‌گه‌ به‌له‌ك "ریشه‌ به‌له‌ك"
ره‌گه‌ به‌له‌ك "عرق السوس- LIQUORICE"، ده‌رمانێكی گیایه‌، سود له‌ ره‌گه‌كه‌ى وه‌رده‌گیرێت بۆ به‌هێزكردنى به‌رگری له‌ش، كه‌مكردنه‌وه‌ى هه‌وكردن و حه‌ساندنه‌وه‌ى لوسه‌ ماسولكه‌ى بۆریچكه‌ى سییه‌كان، جگه‌ له‌وه‌ش وه‌كو دژه‌ به‌كتریایه‌ك كارده‌كات.

سێیەم: ڤیتامین C
چه‌ندین به‌ڵگه‌ ئه‌وه‌یان خستوەتەرو، ته‌نانه‌ت به‌ خواردنی بڕێكى زۆر  ڤیتامین سی له‌ كاتی توشبون به‌ ئه‌نفله‌وه‌نزا و هه‌ڵامه‌ت هیچ كاریگه‌رییه‌كی ئه‌وتۆى نییه‌، بۆیه‌ پێویسته‌ وه‌كو خۆپاراستنێك پێش سه‌رهه‌ڵدانی نه‌خۆشیه‌كه‌ بخورێت. 

چوارەم: سیر
پێكهێنه‌رى چالاكی سیر، پێی ده‌وترێت "ئه‌لیسین"، كه‌ تایبه‌تمه‌ندیی دژه‌ڤایرۆسی هه‌یه‌ و به‌رگری له‌ش به‌هێز ده‌كات و رێگرى له‌ ئه‌نفله‌وه‌نزا و هه‌ڵامه‌ت ده‌كات.
ئه‌لیسین له‌ كاتی جوین یاخود له‌تكردنی سیردا په‌یدا ده‌بێت، پاشان شی ده‌بێته‌وه‌ بۆ گۆگرد و ماده‌ سودبه‌خشه‌كانی دیکە، كه‌ دژه‌ هه‌وكردنن.

پێنجەم: زه‌رده‌چه‌وه‌
جۆره‌ به‌هاراتێكه‌، كاریگه‌رى دژه‌ڤایرۆس، دژه‌كه‌ڕو، دژه‌ هه‌وكردن و دژه‌ ژه‌هرى هه‌یه‌، خواردنه‌وه‌ى زه‌رده‌چه‌وه‌ وه‌ك چای یاخود تێكه‌ڵكردنی له‌گه‌ڵ هه‌نگوین، كۆكه‌ هێور ده‌كاته‌وه‌  و جگه‌ له‌وه‌ش برینی گه‌رو سارێژ ده‌كات.

شەشەم: خوێیاو
به‌ غه‌رغه‌ره‌كرنی گیراوه‌یه‌ك له‌ ئاوى شله‌تێن و خوێ، دیوارى دواوه‌ى گه‌رو له‌ ڤایرۆس و به‌كتریا خاوێن ده‌كاته‌وه‌. هه‌روه‌ها ده‌كرێت به‌ شێوه‌ى قه‌تره‌ یاخود سپراى بۆ خاوێنكرده‌نه‌وى رێڕه‌وى لوت به‌كار بهێنرێت.

ئه‌م بابه‌ته 14040 جار خوێنراوه‌ته‌وه‌‌



Copyright © 2015 Xendan.org all rights reserved
Created by AVESTA GROUP